Nauhak 2 Cu Anmah Umpitu In Rapthlak Zetin An Hrem, Hliamhma In An Khat Thluh

Malaysia, Johor ih um innsang nu pakhat in a fale pahnih kum 6 mi le kum 11 mi cu midang hnenah a umter, thlakhat ah RM800 zat hlawh pe in a fale pahnih cu a umter. Nauhak umpitu pahnih cu nupa tuakkhat an si, cun hmeltheih awcia khal an si lo ih rualpi fehtlang ih theiaw fang an si.

Nupa tuakkhat cun thla 6 sung an rak umpi ih nasa zetin an hrem ciamco, an beng ih an sit ṭheu. Hridai in an tawbet ih tisa in an tawih. Kuak in an nawk. Kum 30 mi innsang nu cu pasal nei nawn lo a si ih hmun dangah hnaṭuan in a hmu.

A fale pawl dinhmun a hmu cu a riahsia tuk “Ka fale pawl ka hmu cu ka thinlung a kekkuai thluh, an taksa pum ah hliamhma a khat thluh. An zahmawh ahcun hliamhma aum lo, asinan an taksa zaten a naa thluh an ti. Tha nei nawn lo mithi vek an si, rawlei dah vek an si” tin Nusa Bestari Police Station hnenah a report.

Innsang nu cu restaurant ih hnaṭuan a si ih sumpai an ṭulhai tuk ruangah duh vekin a suah dah lo. Thla 6 sungah veithum lawng a fale pawl ava tong, a fale umpitu cu a phone ringring ih an damcak thu an rak sim ṭheu. Veithum a tong hnu ihsin cun a fale umpitu pahnih in phuahhlam phunphun hawl in tongaw lo dingin an bum ṭheu.

A caan len Covid-19 damlo kiangih an rak um ngah pang ruangah kharhkhum kan si an ti. Cun na fale pawl cu ni 48 hnu lawngah na tong thei an ti. A hnaṭuanpi hnenah a sim thei ih a hnaṭuanpi pawlin thildik lo aum si ding an ti hnuah a fale pawl ava tong thotho cu zoh ngam lo ding khopin hliamhma an tuar ti a hmu.

Nauhak umpitu pahnih kum 24 mi le kum 32 mi cu palik pawlin an kai ih an thuhla cu buaipi rero lai a si. Nauhak pahnih khal siizung ah an tuamhlawm rero lai. Innsang nu in “Ka pasal in in thihsannak khal a rei hrih lo, nauhak pawl cawm a ṭul ruangah restaurant ah hna ka ṭuan. Ka tong dah lemlo nan anmah umpitu cu ka phone ringring.

Ziangah ka fale pawl hitin an rak hrem, nauhakte an si lai. Sal khal an si lo, an dam lohli theinak dingah thlaza ka cam. Ka ṭhen siang nawn lo, an kiangah ka um ringring thlang ding” a ti. (Hminsin: An zuk aum nan a rapthlak tuk ruangah kan tarlang lo. Na zoh ngam ding ti cu kan thei ko, asinan Facebook lam in an siang lo ruangah a si)

Be the first to comment

Leave a Reply

Your email address will not be published.


*