Nauhak (3) An Thi

Bago, Ayetharyar khua ih um nauhak pathum cu May 30, 2022 simlam nazi 5:30 hrawngah vanduainak an tong. Tiva ah an fen that thluh. May 30 sun ah Ko Pho Thet Yun in a fapa kum 2 mi Maung Thiha Tun le a tunu kum 11 mi Ma The Su Hlaing, Ma Saw Thiri Mon (kum 8) pawl hruai in Tadargyi khua ah an va feh.

Fangfai phur dingin cawleng thawn an poksuak. Tadargyi khualutnak ih um U Hla Win tei inn hmaiah cawleng cu an ret ih caw pahnih cu tidai pe dingin an hruai. Lilawn hnuai, tlangleng lamzin hnuai tiva ah caw pahnih cu tidai an inter, nauhak pawlin caw pahnih cu hridai in an hruai vivo.

Cutin tidai an in laitak ah an parih lilawn ah tlangleng a feh ih caw pahnih in an ṭih tuk ruangah tiva ah an dawp thutthi. Caw hridai kaitu nauhak pathum cu tiva ah an tla thluh, Ko Pho Thet Yun in caw hridai cu a thlah ih tiva ah nauhak pawl cu a hawl nan a hmu thei lo. Tiva hi a thuk in a thazang a cak tuk, a nawi fawn.

Tadargyi khua ah ava tlan ih bawmnak dil in a au ciamco, Tadargyi mino pawl cu tiva ah an dawp ih nauhak pathum cu an hawl. Zanlam nazi 6:00 hrawngah nauhak kum 2 mi Maung Thiha Tun ih ruak an hmu. Yaenee khua kiang tiva ah thicia in an hmu.

Cun a thaisun May 31 zinglam nazi 8:20 ah Ma The Su Hlaing ih ruak an hmu. Nauhak pakhat Ma Saw Thiri Mon (kum 8) ih ruak cu an hmu hrih lo ih an hawl rero lai. Mibawmtu pakhat in, “Nauhak ruak 2 cu kan hmu zo, kum 8 mi Ma Saw Thiri Mon cu kan hawl rero lai” a ti.