Nauhak Kum 5 Mi Cu Cangsualnak Ruangah A Ban Pahnih An Tan

Mizoram, Champhai district, Ngopa khua ih um Pu Vanlalhmuaka le Pi Zomuani tei fanu kum 5 mi Eunik-i cu cangsualnak ruangah a ban pahnih in an tan. Tlawng an kai thok thlang ih phunkhat a zir lai, a ke in cangan dan a zir rero lai.

Siat a tongdan: April 20, 2021 zinglam nazi 10:30am ah an khua Watch tower kiangih Martyr thlanmual ah a naule pawl thawn an lek. Martyr thlan parah a kai ih a kiangih um Electric hri cu hridai menmen ah ruat in a thamsual.

Electric in an thlanglam feet 10 hlatnak ah a hlon, cumi hnuah metre 10 hrawng a tla bet. A naule pawlin midang an va ko ih Ngopa siizung ah an tlanpi hngal, asinan a ban a nat tuk ruangah Aizawl lamah an refer.

Aizawl ah ni 9 sung an tuamhlawm hnuah sibawi in a nunnak hrang a poi thei ti an theih ruangah a ban tan ṭul thu an sim, a pa in damsung rualban lo ih aum ding cu ruat ngam loin sibawi pawl a rawn hnuah beiseinak thawn Imphal, RIIMS hospital ah an feh.

An neih sumpai khongkhawm in Imphal lam an panpi, Imphal khalah a ban tan a ṭul thu an rak sim thei. Cutin, ui le poi ti zet cingin Eunik-i ih ban pahnih cu an tansak.

Innsang harsa zet an si ih innsang pabik cu innsak in a hlawhaw ṭheu, nubik cu fale pawl kilkhawi hi a hnabik a si. Inn le lo hnget an nei lo ih BDO ih theihthiamnak in an khua BDO quarter ah inn an luah.

A nulepa in banlem an ngaihtuah sak rero lai nan tingtel man a si ruangah ruahsannak an nei tam lo. An innsang phurrit hi malte a zangkhai theinak dingah a tam, a mal ti loin na bawm thei a si. Sumpai lam ih na remcang lo asikhallen veikhat te tal na thlacamnak ah na rak mang ding sokhaw.

Be the first to comment

Leave a Reply

Your email address will not be published.


*