Nauhak An Ruk Hlo Mi Cu Kum 14 Hnuah An Hmu, Asinan Amah Rak Cawmtu Hnenah Aum Duh Sawn

October 9, 2007 ah China, Hubei khua ih um nauhak kum 4 mi Sun Zhuo cu misual in an ru hlo hnuah fa nei thei lo hnenah an zuarsawng. Pacang Sun Haiyang in a fapa hlo cu kum 14 sung het leh chet tin a hawl rero nan a hmu thei nawn lo, palik le khawtlang upa pawl khalin an hawlpi rero nan a sulhnu hmuh ding aum nawn lo.

Sun Haiyang in a fapa a hawlnak ah an inn le lo khal a zuar ih a fapa hmutu cu laksawng ah £23,000 (200,000 yuan) zat pe dingin tualsung thuthang sungah a tarlang. A fapa hlo a hawlnak ah an rawl dawr khal a zuar, cutin a fapa ngai in nitinten a ṭap ringring.

Sun Haiyang in, “Kum 14 sung ah ka fapa vek an hmuh thu in sim veten ka va feh ih ka hawl hngal ṭheu. Nikhat ah veikhat phone call ka dawng lo asilen ka riahsia tuk, laksawng beisei ruangah thuphan per in ka fapa an hmuh thu in sim asikhallen ka lungawi tuk thotho, beiseinak malte in pe sawn” a ti.

An fapa a hloh hnuah fapa pakhat an neisal ih tu’ahcun kum 8 a kim zo. An fapa hlo an hawl rero hnu kum 14-nak ah palik pawlin an fapa cu an hmu ngah ih Sun Haiyang cu a lungawi tuk ruangah a ṭap. Cun an fapa rak rutu minung 9 khal an kai ih an fapa cawmtu khal thusut dingin an hruai.

Cutin palik sakhan ah an fapa cu an va tong ih an fapa khal a ṭap ve. Asinan, a nulepa ngai kiangah aum duh lo ih amah rak cawm thangliantu nupa hnenah aum duh sawn thu a sim thei cu hringtu a pai lung a kuai. A fapa Sun Zhuo in a duhhrilnak ah a sual thu a sim thei ih, “Innsang thar ka nei zo, asinan nulepa pahnih ka nei” a ti. An thuhla cu court le palik pawlin an buaipi vivo ding.

Be the first to comment

Leave a Reply

Your email address will not be published.


*