Nauhak Kaihrem Ih Thattu (3) Cu Mipi Thinheng In An Urthat

Guatemala ram, Guatemalan khua ah misual pathum in tualsung mipa nauhak kum 11 mi Freddy cu an kaihrem.

August 11, 2022 zing ah tlawnginn lam a feh laiah an kaihrem ih a innsang pawl hnenah sumpai an dil. Meithal keng in nauhak cu an zukpi ih a nulepa hnenah sumpai £10,900 in tlensuak uh’ an ti. A nulpe in sumpai an hawl ih a hrek lawng an pe thei.

Suamhmang pawlin sumpai kimcang in an ngah lo ruangah nauhak te cu an that ih an hlon. Khuasung mipi pawlin nauhak te ih ruak cu an hmu ih an thinheng tuk, suamhmang pawl cu an zingzoi ih an pathum in an kai ngah.

Palik kutsung ah an hlan, August 22 sun ah an thuhla relcat dingin palik pawlin an kai. Cutin an um laiah khuasung mipi pawl ih thinhengnak a sosang ciamco ih palik kutsung ta an lonsak, mipi cu 6,000 hrawng an si dingih palik pawl khal an cangvai thei lo ih an zohliam men.

Khuasung mipi pawlin suamhmang pathum cu an vel ciamco hnuah an urkang, an ruak khal zo an si ti theihthiam aum nawn lo. Suamhmang pawl ih inn khal an va urkang cih. Suamhmang pahnih cu kum 24 mi an si ih pakhat cu kum 38 mi a si. Palik pawlin suamhmang thattu lakah zohman an kai hrih lo, mipi an thinheng tuk lai ruangah zohman an kai ngam lo.

Be the first to comment

Leave a Reply

Your email address will not be published.


*