Nauhak Kum 3 Mi Dehtu Tisartan Tumpi An That

Africa, Kenya khua te ah tisartan tumpi an that. Nauhak kum 3 mi le a nu cu tiva ah tak an kolh ih tisartan in nauhak te a deh, hringtu a nu cu bawmtu nei lo in a fahniang ih thih lai cu a hmu. Tualsung mipi pawl cu an thinheng tuk ih tisartan cu an hawl, tiva kiangkap ah thang an kam.

Sa an ret ih thang an kamnak ah tisartan cu an awk, tisartan cu a tumtuk ih feet 17 in a sau. Tualsung mipi pawlin an awhmi tisartan cu hreitlung in an cek that. An khua upa in, “Sa kan ret ih thang kan kam, tisartan in sa a ei veten a awk ngah cih” a ti.

Himi tiva ah tisartan an tamtuk ruangah cozah in tiva ah feh lo dingin theihternak an suah zo, cozah in tiva ah tidai khai ṭullo dingin an tawlrel, asinan tiva cu an eihawlnak, an nga hawlnak a si ruangah khuasung mipi pawlin tisartan hi that thluh dingin cozah hnenah an dil. Minung hrangah an ṭihnung tuk an ti.

Tisartan thi cu ṭuanvo neitu pawlin an la. Tisartan in an rannung vulhmi khal a deh ṭheu. August 2020 khalah nunau kum 32 mi cu himi tiva thotho ah tisartan in a keu, nga hawltu pacang pakhat khal tisartan in a keu zo.