Nauhak Kum 7 Mi In Bomb A Sar Ih An Lekpi Rero Laiah A Puak, Nauhak A Thi Ih Midang Hliamhma An Tuar

Shan State, Hopon Township, Mong Pyin khua ah mipa nauhak kum 7 mi in bomb a sar ih an lekpi rero laiah a puak. April 26 sun ah tikawng kiangkap ah nauhak pawl an lek, cutawk ah bomb a sar ih bomb ti an theithiam lo. Leknak men ah an ruat.

Bomb cu an inn ah a tlunpi ih an lekpi rero laiah a puak thutthi, nauhak kum 7 mi cu a hmun ah a thi. Nauhak dang 3 in hliamhma an tuar, innsung ih um tleirawl kum 17 in hliamhma nasa zet a tuar ih a kut voihlam an tan.

An khua lal in, “Lamzin kap tikawng ah an lek ih bomb a sar, milem te ah an ruat ih an tlungpi. An lekpi rero laiah a bomb ih a hmun ah nauhak pakhat a thi, nauhak 3 in hliamhma an tuar ih siizung ah an tuamhlawm rero lai.

Mithi cu a sun ah kan vuiliam, phun 10 exam tuah tleirawl kum 17 mi ih voihlam kut khal bomb puak hliamhma ruangah an tansak. Innsang harsa zet an si ih siivai leinak ding hrang bawm an ṭul tuk” a ti. An khua kiangkap ah hriamkai SSPP/SSA, PNLO/PNLA le ralhrang pawl an cangvai ṭheu.

Khuasung mipi pawlin zovek hriamkai khal nan silen kan khua kiangkap ih nan kammi bomb hi ra thianfai sal uh’ tin an ngen. Tualsung mi pakhat in, “Bomb a puak thutthi ruangah mipi cu kan lau tuk. Hmuan feh ngam khal an um nawn lo, caw le naa khal hmuan ah an thlah ngam lo” a ti.

Be the first to comment

Leave a Reply

Your email address will not be published.


*