Nauhak Phun 7 Tlawngta An Kap Ngah Ih Siizung In An Rak Tuamhlawm Duh Lo

Mandalay, Meiktila, Gway Tauk Kone khua ih um nauhak phun 7 tlawngta cu June 23 zan nazi 8:30 hrawngah zo ti theih loin an kap ngah. Bike thawn minung 3 an phuraw ih vengsung ah meithal an kap ciamco, nauhakte in meithal awn a theih veten an kuva dawr ihsin a tlansuak ih a kawng ah an rak kap ngah.

Meithal kaptu 3 cu zo an si ti an thei hrih lo ih an tlanhlo hngal. Pyay Thar Yar Social Welfare Association pawlin an buaipi ih siizung dangdang ah an tlanpi rero nan zohman in an rak cohlang lo, ralkap in zan vahsuah an siang lo nan emergency in zanvar an tlankual rero ih an hlawhsam thotho.

Runsuaktu mino 2 cu zanvar itthat loin an buaipi ih tu’khalah siizung an hmu thei hrih lo ruangah inn lamah an tlunpi. Ṭuanvo neitu in “Mizan ah hliamhma thawn inn ara thleng ih siizung dangdang ah kan tlanpi rero nan zohman in an rak cohlang lo.

A thisen a suak tamtuk ruangah thisen suak nawn lo dingin kan tawnbet ih cozah siizungpi ah kan tlanpi, cutawk ihsin Meikhtila Military Hospital ah kan tlanpi sal ih an rak cohlang cuang lo ruangah ihkhun 1000 umnak Nay Pyi Taw cozah siizung ah kan tlanpi sal.

Thuhla a phunphun ruangah an rak cohlang lo ih Leway Hospital ah kan tlansal. Leway siizung ihsin ihkhun 200 umnak siizung ah, ihkhun 200 umnak siizung ihsin Sangha Hospital ah, Sangha Hospital ihsin Nay Pyi Taw ralkap siizung ah,

Nay Pyi Taw ralkap siizung ihsin siizung dangdang ah kan tlan rero nan tutiang siizung kan hmu thei hrih lo” a ti. Inn lamah an thei dandan in an tuamhlawm rero lai, a nunnak hrang a thinphang um tuk lo nan siizung ih tuamhlawm a ṭul tuk ti a si.

Be the first to comment

Leave a Reply

Your email address will not be published.


*