Naupai In Tiva Ih Fen Nauhak 3 A Runsuak, “Pathian Cangvaihnak” A Ti

Michigan nu Alyssa DeWitt cu naupai a si ih thla 5 a kim zo, May 25 sunah a fate 3 thawn First Street Beach ah an feh ih boruak thiang an hawp. Alyssa DeWitt in “Thli a hrang tuk ih inn ih um men ding ka si nan ka va feh ṭul in ka theihawk ruangah thli hrang lakah kan va feh” a ti.

A fale pathum kum 6, 3, 2 mi cu tiva kap ah leithanel an puah rero, nidang ahcun tiva kehlam ah caan an hmang ṭheu nan himi sun ahcun tiva vorhlam kap ah a fale pawl cu a fehpi. Alyssa DeWitt in “Nidang ahcun tiva kehlam ah ka fehpi ringring, himi sun cu ziangruangah ti khal ka thei lo vorhlam kap ah ka fehpi hai. Keimai duhrilnak cu a si zik lo…” a ti.

Tiva kap ahcun a to ih tiva ih lek rero nauhak pawl a zoh, nunau nauhak tete pathum cu tithuknak lam ah an feh ih an buai hngal. Thli a hrang tuk ruangah tisuar in a la ih an pil thutthi lai cu a hmu, a caan leh tisung ihsin an kutban an rung phar ciamco.

Alyssa DeWitt in an talbuai ti a theih veten a fate pathum cu tikap, hmunhimnak ah rak um uh a tiih tithuknak lamah cun ava tlan hngal. A tlan phah ah 911 a phone ih thli a hrang tuk ruangah a ṭong khal an rak theithei lo.

Tiva ah nauhak pathum ih kut a hmu nawn lo ruangah thil pakhat khat ka tuah lohli a ṭul tin phone cu a bia nawn lo ih tisung ah a lut cih. Caan reipi sung a buaipi ih thli a hrang tuk ruangah a runsuak lohli thei lo, thli thazang le tisuar in tisung ah an dirlut sal cingcing. Nauhak pakhat cu a dirsuak thei ih nauhak nute in thlaphang tuk in “Ka thi ding” a ti.

Alyssa DeWitt in “A mit ah ṭih thlaphangnak tumpi ka hmu ih nui dinhmun in thazang tumpi ka ngah vutvi’ a ti. ‘Ka lo tiam, Ka lo thihter lo ding’ a ti. Cutin midang pahnih khal harsa zetin tisung ta cu ava dirsuak thei, tivakap a thlengpi ih a fale pathum in an rak bawm.

Runsuahtu pawlkom Emergency khal an thleng cih ih an zaten an him thluh, a pum sungih naute khal an zohdik ih a ṭha an ti. Mipi in a thuhla an theih tikah cun a phunphun in an lawm, an fak ih “Nuralṭha na si” an ti.

Nauhak 3 ih innsang pawl khalin lungawithu an sim. Alyssa DeWitt in “Pathian ih cangvaihnak a si, Pathian in ka um ṭulnak hmun ah in umter. Tuizan cu ka fale pawl ka duhdawt cuang, nauhak pathum ih nulepa khalin nan duhdawt cuang ding ti ka thei. Pathian hi a ṭha tuk aw” a ti.

Be the first to comment

Leave a Reply

Your email address will not be published.


*