Naute 10 A Hring, World Record A Ngah

Veikhat nau neih ah naute 10 rori nei cu a mak in a danglam zet. South Africa, Pretoria khawpi ih um nu kum 37 mi Gosiame Thamara Sithole in June 7 sunah naute 10 a hringsuak ih naute hring tambik World Record a ngah cih.

A hlan ih World Record rak ngahtu cu Morocco khua ih um Halima Cisse a si ih damten naute 9 a hringsuak. Gosiame Thamara in faphir kum 6 mi anei zo, tuiṭum ih a naupai laiah sibawi in naute 6 na nei ding an rak tiih nau aneih zik zawngah an zohsal ih naute 8 na nei ding an ti sal.

Asinan, nau avung nei ngaingai cu 10 an rak si, mipa 7 le nunau 3 an si. Gosiame Thamara in “Nau ka pai laiah taksa damlonak ka nei ṭheu ruangah damten nau ka nei thei lo ding ti ka rak phang tuk lawk” a ti.

A pasal Tsotetsi khal a lungawi tuk ih umngaihnak a thei lo, media pawlin thu an va sut ih a pasal Tsotetsi in “Mipa 7 le nunau 3 an si, thla 7 le ni 7 sung lawng nau a pai. Ka lungawi tuk, ka ṭong tam thei nawn lo, thaizing ah kan bia aw leh ding” arak ti.

Gosiame Thamara in zarh 29 sung lawng nau a pai ih operation in nau a nei, tuamhlawmtu sibawi in “Naute le a nu cu an dam ṭha zet” a ti. Thla 2/3 hrawng cu naute kilkhawinak siizung ah an um lai ding, cumi hnuah an inn lamah an tlungpi ding.

Be the first to comment

Leave a Reply

Your email address will not be published.


*