Nay Pyi Taw Bomb Puak Ih Hliamtuar Ralbawipi Ih Ke Tan A Ṭul

October 5 simlam nazi 4:00 hrawngah Nay Pyi Taw, CID (Criminal Investigation Headquarters) office sungah bomb a puak ih ralbawi 4 in hliam nazet an tuar. Criminal Investigation Headquarters cu rinhlelmi thilri, tettikhannak thilri pawl hlakhlainak hmunpi a si, tettikhannak thilri pawl an zohdik rero laiah bomb arak um ih a puak ruangah hliam an tuar.

Hliamtuar ralbawi pakhat cu thih le nung karlakah aum lai, midang khal ralkap siizung ah an tuamhlawm rero lai. Lieutenant Colonel Zaw Than cu a hliamhma tuar a roh tuk ruangah a ke pakhat tan ṭul a si.

Ṭuanvo neitu pakhat in “Ralbawi Lieutenant Colonel a si. A ruhcang a kiak, tuisun ah an tan ding. A khuk ihsin an tan ding, an tandan ding pawl an zohdik rero lai” a ti.

CDM tuah sibawipi pakhat in “Ruhcang kiak men a si lo ding. Ke tan ṭul dinhmun cu a ruh pawl a sup dip thluh a si ding. A sa le a ruh pawl an rawiaw thluh ruangah tan a ṭul a si ding, ruhcang kiak lawng cun tan a ṭullo. Ruh pawl a dip thluh asilen tan a ṭul ṭheu” tin ke tan ṭul pawl ih dinhmun umdan a rel.

Ralkap pawlin himi bomb puak thuhla ah zianghman an relsuak hrih lo. Hmin tarlang rem ti hrih lo pawlkom pakhat in anmai cangvaihnak a si thu an relsuak ih Nay Pyi Taw ih um ralbawi pawl umnak ah an cangvai vivo ding thu an phuang.

Be the first to comment

Leave a Reply

Your email address will not be published.


*