Ngal-cang In Kachin Kawhhran Upa A Tai That

Kachin State, Hpakant Township, Shaduzup khua ih um pacang kum 66 mi MangShang Yaw Htang cu Novemver 11, 2021 zinglam nazi 10:00 hrawngah vanduainak a tong. Amah hi kawhhran hruaitu upa a si.

Ramlak ah thang an kam ih ngal-cang an awk, minung pathum an si ih ngal-cang cu a talsuak thei ih arak sual ciamco ih pakhat a thi ih pahnih in hliam an tuar. An thuhla theitu pakhat in “An pathum in ramlak ah thang an va kam, ngal-cang pakhat an awk ih ngal-cang cu a tum ngaingai.

Namtong in an va sat ih namtong cu arak keu tang. Mual liamtu in ‘Thangkamnak hridai a cat zik, tlan zang uh’ tin a au ih amah cu a tlan man nawn lo. Ngal-cang in napin a tai ciamco” a ti. A ke pahnih ah hliamhma a tuar ih a thin khal a siatsuah, cutin a hliamhma pawl tuar loin a thi. Himi ngal-cang cu ralkap pawlin vei-4 an kap hnuah a thi.

“An thawmvang cu lamzin kap ih um pawlin an rak thei, bawmnak an va dil ih an fehsal. Ngal-cang cu mithi ruak kiangah arak um ringring lai ih mi arak bawh, ralkap pawl an va feh ih vei-4 an kap hnuah a thi” a ti.

Mi pahnih khal hliam an tuar ih kum 50 mi U Daw Khaung ih hliamhma tuar hi a nasa tuk ruangah Myitkyina Hospital ah an phur. Himi kiangkap ah hivek thil an tonlonak hi kum reipi a si zo, hi thil a thlennak cu khua ihsin peng 2 hrawngin a hla. Fang-at cuh laitak a si ih ramvok/ngal pawl an ra suak ṭheu.

Be the first to comment

Leave a Reply

Your email address will not be published.


*