Ngapi Sungah Aum Lawk, “Ka Thi Thlang Ding Tin Ka Fapa Ka Seherh Tuk” A Ti

Kum 40 mi Michael Packard cu nga le kaikuang hawl ṭheu a si, June 11, 2021 sunah kaikuang hawl dingin lawng par ihsin a dawp ih thil danglam zet sungah a lut ngah.

Nga tumpi Humpback Whale kaa sungah a lut ngah, second 30-40 hrawng cu nga kaa sungah aum ih a suak theisal.

Michael Packard in “A thim thluh ih a cang rero, haa anei lo ti ka theih veten whale nga a si ti ka thei. In dawlh tum rero ih, ka suak thei nawn lo ding a si hi. Ka thi thlang ding tin ka thinhar tuk lawk, cutawk lai ih ka ruahmi cu ka fapa 2 hi an si, an nauhak tuk lai. Kum 12 le kum 15 lawng an si lai ih ka seherh tuk” tin a thilton pawl cu media hneah a sim.

Ngapi ih kaa a annsal veten a tha neih zaten suah in arak tlansuak thei, ngapi khal tisung ah a pilsal ih Michael Packard cu nga hawl midang in an runsuak, runsuaktu Captain Joe Francis in “A nundam thei cu a vanṭha tuk lawmman” a ti.

Siizung ah an tlanpi hngal ih a keruh kiak dingah a ruat nan a kiak lo, hliamhma zianghman a tuar lo ih a zanlam ah a suak thei. Sibawi in a dam ṭhah veten ngan a hawl theisal ding thu a sim.

Zingzoitu pawlin “Ngamaan arak si lo cu ava ṭha tuk, whale nga in minung an siatsuah dah lo. Rawl an hawl caan ah reipi an kaa an ang ṭheu ih, cutawk laiah a dawp ngah si ding” an ti.

Michael Packard cu a vanṭha ve hrimhrim, kum 10 liamzo ah vanzam accident arak tong zo ih a thi lo. Costa Rica a tlawng laiah vanzam te pawl a to ih an cangsual.

Vanzam mawngtu, co-pilot le passenger pakhat an thi. Vanzam to minung 5 cu ramlak ah an tlahlo, hliam nazet an tuar thluh. Ni 2 le zan 2 an hawl hnuah ni 3-nak ih an hmu lo asilen an nundam thei nawn lo ding an ti zo. Cutin, a sun ah an hawl ciamco ih hliamhma thawn an zaten an hmu thluh thei.

Be the first to comment

Leave a Reply

Your email address will not be published.


*