Ni 11 Sung An Doawk Hnuah Israel Le Hamas Cu Remnak An Tuahfel

Hlanlai ihsin Israeli Zionists le Hamas fighters (Palestinian) pawl cu an rak doaw ringring zo. May 10, 2021 ihsin an doaw ciamco sal.

Hamas fighters pawlin bomb le pukpi thawn Israel pawl an kap ciamco ih Israel in bomb mitnei in Hamsa pawl ih bomb cu vansang ah an rak kap puaksak thluh.

Ni 11 sung nasa zetin an doaw ih minung 244 an thi ih hliamtuar khal an tam zet. Inn le lo tampi an siatsuah, tuiṭum an doawknak ah Palestinians lam minung 232 an thi ih cumi lakah nauhak 65 an tel. Israel lamah minung 12 an thi tin an nenhnget.

Egypt pawl ih tawlrelnak zarah an kahawknak cu an cawl thei. Egyptian President Abdel Fattah Al-Sisi in khatlam khatlam in a be veve ih remawknak tuah dingin a lem hnuah an tuah thei.

Tuiṭum an kahawknak ah nehtu an um lo nan Palestinians mipi pawlin nehtu vekin an rak lawm. Israel mipi pawl khalin nehtu vekin an aipuang ve, khatlam khatlam in nehtu an si veve tinak a si.

Egyptian President Abdel Fattah Al-Sisi

Leitlun ih an buaipi zetmi ram pahnih an si ih kahawk an cawlh thei ruangah USA, UK, Germany, China, EU le ramdang dang pawlin an lungawipi thu an tarlang. Cun, remnak tuahsaktu Egypt par khalah lungawi thu an sim.

China khalin a lungawinak a langter ve ih UN relief fund le Palestine siattong pawl hrang bawmnak a pe tum. Isarel le Hamas cu ui le mee vek an si ih ziangtik tiang remnak an tuah thei ding ti cu theih a si lo, asinan tui dinhmun ah remnak an tuah thei cu a hnangam um zet.

Be the first to comment

Leave a Reply

Your email address will not be published.


*