Ni 40 Hnuah A Ruak An Hmu

September 20, 2021 sun ah Kayah State, Dimawso ramsung ah mipi kilhimtu KPDF le ralkap pawl an doaw ciamco ih mipi kilhimtu pahnih an thi ih hliamtuar 4 an um. Doawknak tualrawn ih mual liamtu tlangval kum 21 mi Sai Bhone Min Thant ih ruak cu ni 40 hnu lawngah an hmu.

Sep. 20 sun an doawknak ah a fala thawn hmainor in an um, a fala cu himdamten sakhan a thleng thei. Sai Bhone Min Thant ih ruak cu October 30 ah an hmu. Ruak hawltu pakhat in “An kahthatnak tikhur kiangah kan hmu. A rim a sia tuk ruangah a kiangah kan urkang, a ruhro pawl cu kan la” a ti.

Sai Bhone Min Thant ih ruak cu ahlan khalah an rak hawl tum rero zo nan a kiangkap ah ralkap pawl an relh thup ti an theih ruangah an va hawl lo. Ralkap pawl an tlan hnuah an va hawl ih a thihnak hmun ah arak um lai.

(A hlan ih a thuhla kan rak post zo mi siar duh hrang a hnuai ah) September 20, 2021 sun nazi 12:00 hrawngah Kayah State, Dimawso ramsung ah mipi kilhimtu KPDF le ralkap pawl an doaw ciamco. An doawknak ah fala le tlangval duhdawt aw zet khal an ṭhenaw, tlangval Sai Bhone Min Thant cu doawknak tualrawn ah a thi.

A fala Hlaing Pwint Phyu (Jan) cu zankhat sung ramlak ah mitthli thawn amahten a vakvai ih a thaizing lawngah a rualpi pawlin an hmu. Hlaing Pwint Phyu in “Sai Bhone Min Thant, hnemawknak ding ka nei nawn lo. Kan thlennak a rei hrih lo ih doawknak ahcun tel hrih hlah aw ka ti rero nan a feh cak tuk ruangah Jan khal doawknak ih telve dingin in sawm.

Kan van ava duai lawmman so, ka mithmuh rori ah mual in liamsan maw. Zankhat le zinglam sung cu tupi sungah keimahten ka vakvai. Nazi tampi sung khuathim lakah ka vakvai ih na tel nawn lo ruangah ziangtlukin ka cau, ka lungthin a kekkuai ti cu in hmu thei maw… Ziangah in fehsan, a tha bikin ka rak lo humhim thei lo cu ka damsung in ka ngaithiam aw nawn zik lo.

Kan theihawk pek ihsin kan tlan ni tiang in rak humhim ih in ngaihsaknak parah ka lungawi tuk” tin a facebook cahmai ah a tarlang. A tlangval in mual a liamsan hnuah meithal a keng ih ralkap pawl do dingin a man zo, a meithal par khalah a tlangval ih hmin a ngan.

Hlaing Pwint Phyu in, “Ka U Sai, mifel le miṭha, mi bawm duh zettu in meithal kengin raldo na duh thu in sim lai ahkhan ka rak zum thei lo. In rak dil rero lai ahkhan ka rak lo leisak lo cu in ngaithiam aw maw. Uniform kim le meithal kan nei thluh zo tin lungawi zettu ding nangmah na si nan na um nawn si lo. Tu’ah thinlung kekkuai ih meithal run kaitu cu keimah ka si zo, na lungawi maw Sai… Vanram ihsin hni siamsiten in run zoh awla aipuang zetin rak um hram aw…” tin a tarlang.

Be the first to comment

Leave a Reply

Your email address will not be published.


*