Nikhat Hnu Nikhat Myanmar-China Ramri Buainak A Sosang Vivo

Myanmar-China ramri buainak cu nikhat hnu nikhat a sosang vivo tin kiangkap um mipi pawlin tualsung media hnenah an sim thei. Myanmar ramsung a buai hnu ihsin China cozah in ramri hi arung nor ciamco, ramri nortu pawlin ‘Covid-19 ruangah an tiih feet 50 lenglo ah ramri phitnak thirhri pawl an khang.

Himi ramri an norawknak cu Shan State, Muse Township sungah a si. Pan Kham khuami U Sai Naw (kum 40) in, “Kan leilet sungah ramri phitnak thilhri an rung ret veten kan va phelhsal thluh. Kan loram hi China ramsung ah a lut ding ti kan phang zet, kan loram hi China ramsung ih a lut asilen eihawlnak kan nei nawn lo ding” a ti.

China cozah in Covid-19 ruangah ramri lan an siang lo ih ramri an phit thu an rak sim thei ve, cun hitin khuasung mipi pawlin ramri phitnak thirhri hi an rak phelh cingcing asilen nan loram sungih suak pawl kan lo leisak nawn lo ding tin an hringhro ruangah khuasung mipi pawl cu an thinhar zet.

Khuasung mipi pawlin an ramri buainak cu tlunlam thuneitu pawl hnenah an sim thei nan zohman in an va buaipi lo. Khuasung mipi pawl lawngin anmahten an buaipi aw. Tualsung mi pakhat in, “Ziang cozah hman in in ra buaipi lo. Kanmahten kan buaipi awk a ṭul, China lamin len in rak hringhro bet. Kan loram sungih suak pawl hi China cozah in an lei nawn lo asilen buainak kan tong bet ding ruangah kan thinhar zet” a ti.

Ramkhelhnak ih tel Sai Myo in, “Ka hmuhdan ahcun ramkhelhnak thu thawn a pehtlaihaw ding, kan ramsung a buai laiah China in caanṭha an rak la tum ve a si ding. Kan ramsung a buai laiah ramri an rak nor tum a si ding, ramri thuhla ah ziang cozah hman in an ra buaipi lo” a ti.

Mong Ko ramri kiangkap ah MNDAA le ralkap pawl an doawk rero lai ruangah China pawl ih an khanmi ramri phitnak thirhri cu zohman in an va phelh ngam hrih lo. Pangkham khua kiangih an khanmi ramri nornak thirhri cu khuasung mi 140 lenglo in an va phelhsal ih China lam in ziangtin an ra cangvai sal ding ti an zoh ringring lai. Pangkham khuami Sai Naw in, “Ramri an phitnak thirhri pawl cu kan va phelhsal thluh nan kan buainak cu hitin a cem hrih lo ding. Ziangthil a thleng vivo ding ti kan thei hrih lo” a ti.

Be the first to comment

Leave a Reply

Your email address will not be published.


*