Nikhua A Sia, Ruahsur Hnuai Ih An Um Rei Tuk Ruangah Mindat Raltlan Naute Ni 6 Mi A Thi

Chinram, Mindat ramsung Pukun khua ah thuneihnak latu ralkap le mipi kilhimtu pawl an kapaw rero lai. May 21 zanlam ah ralkap pawl cu uniform hruh loin an vaksuak ih an kapaw ciamco, mipi kilhimtu Salai Thang Naing an kap that.

Mindat mipi hruaitu upa pakhat in “Ralkap pawl cu an uniform an hruh lo ih mi pangai vekin hnipuan an hruh. Raltlan vekin an ra ih kan kapaw. Ahlan vekin RPG le mortar bomb pawl an hmang” a ti.

Mipi kilhimtu lam minung 9 in hliamhma an tuar nan an bese tuk lemlo. Ralkap lam pakhat a thi ve ih hliamhma tuar khal an um hnuaihni ti a si.

Pukun kiangkap ih um khua pawl cu mipi in an suahsan thluh ih ramlakah an um, ei le in an harsa ih mikeu lakah an khuasa. Culai ah ruah a sur ciamco bet ih khuadai lakah caan an hmang.

Naute suak pek ni 6 mi cu nikhua sia, ruahsur lak ih aum rei tuk ruangah pneumonia nat a ngah ih tuizing May 22 zinglam nazi 1:00 ah a thi tin Khonumthung Burmese thuthang ah an tarlang.

Be the first to comment

Leave a Reply

Your email address will not be published.


*