NLD Party Mi (217) In Ralhrang Hnenah Pinsin Hlawh An Lak Thu Ralhrang Pawlin An Phuang

NLD Party ihsin mi 217 in ralhrang hnenah pinsin hlawh an la tin ralhrang pawlin August 16, 2022 zan nazi 8:00 ah an phuang. A veihnihnak rampi huap hriltling mi palai pawl hlawh peknak an nei ih party palai mi 491 hnenah pinsin hlawh an pe.

Cutawk ah USDP palai (98), Shan Party pakhat SNDP ihsin mi (43) le NLD ihsin palai (217) in pinsin hlawh an la ih sumpai kyat million 4000 zat an zemsuak thu ralhrang pawlin an phuang. NLD Central Work Committee (CWC) U Tun Myint in, “2015 kum lai ih palai pawl an si men thei, 2020 kum hrilawknak ih tel nawn lo pawl an si men ding.

Ralhrang pawl hringhronak ruangah an la tla a si thei, a cipciar cun kan thei lo. Tuvek caan ah ralhrang hnen ih pinsin hlawh latu pawl cu mai hrang lawng ruat pawl an si. Dothlennak le mipi pawl phatsantu an si. Zovek khal an thi asilen kei ka thi lo cun a tawk titu pawl an si” a ti.

Ralhrang in ramsung thuneihnak an lak hnuah NLD palai ṭhenkhat cu ralhrang hnenah tettikhannak hmin an khenlut, ṭhenkhat cu ralhrang pawlin an hringhro ruangah cangvaitu khal an um. Ralhrang kuthnuai ih um duh lo pawl cu an kai ih thubuai phunphun an orhter, ṭhenkhat cu an that. NLD palai tam zet cu sahimnak hawl in an tlan ih an inn le lo cu ralhrang pawlin an lonsak.

Be the first to comment

Leave a Reply

Your email address will not be published.


*