North Korea Ram Ah Ni 11 Sung Hnih An Siang Lo, Kim Jong Un Pai Thihcam A Thleng

North Korea mipi pawl cu an cozah in ni 11 sung hnih le zu in an siang lo, puai tuah le lungawinak hrimhrim zohman tuah an siang lo. A san cu an ram hruaitu Kim Jong Un ih pai thihcam a thleng ruangah a si, Pu Kim ih pa Kim Jong Il hi North Korea lal sual zet arak si.

1994 ihsin 2011 kum tiang North Korea ram a kaihruai ih December 17, 2011 ah kum 69 mi si in heart attack in a thi. Kim Jong Il in kum 17 sung North Korea ram a kaihruai, a thih hnuah a fapa pathumnak le nautabik a si mi Kim Jong-un (kum 37) in a keneh rung thlun in North Korea ram a kaihruai.

Kumdang ahcun Kim Jong Il ih thihcam hi ni 10 sung lawng an riahsiatnak an langter ṭheu nan tuikum cu kum 10 kimnak a si ruangah ni 11 sung an riahsiatnak an langter. Kim Jong Il ih thih sun December 17 ahcun zohman bazar kai an siang lo, dai reprep in an umter thluh ṭheu. Tualsung mi pakhat in, “Himi riahsiat ni 11 sungah hnih le zu in an siang lo, cangvaihnak zianghman tuah an siang lo.

Kumdang ah himi ni sungah zu in le thil dangdang tuah an kaihmi pawl cu sual rapthlak zet tuahtu tin an kai ih hmundang ah an hruai, an kaihmi pawl hi tutiang kan hmu nawn lo. Himi ni sungah mithi an um asikhallen ringpin ṭah an siang lo ih an phum lohli. Himi ni ih birthday nei pawl cu birthday lawmnak caan an hmang thei dah lo” tin a thupten media hnenah a sim thei.

Ralkap le palik pawl khal himi ni sungah nasa zetin duty hna an ṭuanter ih daan le dun pahbaltu pawl an hawl, zan khal itthat thei loin an duty ter ih security hngetkho zetin an tuah. Kim Jong Un tei innsang ihsin mi pathum in North Korea ram hi an kaihruai zo, a pa in arak kaihruai ih a pu Kim Il Sung khalin arak kaihruai.

A pu Kim Il Sung in 1948 ihsin 1994 kum tiang North Korea ram hi a kaihruai ih a thih hnuah a fapa upabik Kim Jong Il in a lal tokham ah arun to. Kim Il Sung ih thicam khalah zarhkhat sung riahsiatnak an langter ṭheu ih hnih le zu in an siang lo, hna an ṭuan thei lo ruangah mipi in harsatnak phunphun an ton phah.

Tualsung mi pakhat in, “Zianghman kan tuah thei lo ruangah kan harsa deuhdeuh, mithi zo pahnih ruangah mi tampi in harsatnak an ton phah ṭheu hi cu a buaithlak tuk. Riahsiat ni hi malte ṭhum deuh sehla mipi hrangah tuardan a ziaum deuh ding. Himi riahsiat ni caan ah Kim Il Sung le Kim Jong Il ih ropitnak thuhla in ra sim thei ringring ih a ningum tuk” a ti.

Be the first to comment

Leave a Reply

Your email address will not be published.


*