Nu Kum 36 Mi In Fate 44 A Nei, A Pasal In A Tlansan Ruangah An Nun A Har Zet

Africa, Uganda khua ih um nu kum 36 mi Mariam Nabatanzi in fate 44 zat a neih hnuah a pasal in a tlansan ih amah lawngin a cawm thanglian thluh thei. Ziangtin a kum aitam fate a nei thei tin na ruat men ding, amah hi damlonak danglam zet aneih ruangah a sul sungah mipa cii hi an nung tam thei zet.

Veikhat nau aneih ah pa 4, 3, 2 tin anei ṭheu, pakhat lawng nau a hring dah lo. Kum 12 mi a si ah pasal anei ih a pasal cu a aiin a letin a upa sawn, kum 13 a kim ah nau anei. Phir hi vei 6 anei, phir 3 hi vei 4 anei, phir 4 hi vei 3 anei.

Nau khamawk a tum ṭheu nan siibawi pawlin a hrangah a ṭha lo thu an rak sim ruangah nau khamaw loin an um. Mariam Nabatanzi in a nauhak lai ih a vanduai thu a rel, A suah hnu ni 3-nak ah hringtu a nu in arak tlansan, unau 5 an si ih a pa in a umpi.

A pa in nupi dang a neisal ih a nuei cun a hmuhsuam thei zet, an rawlei dingah tursia arak ret ruangah a unau dang pawl cu an thi thluh. A vanṭhanak ah anih cu inn dangah arak um ih tursia cu a ei ngah ve lo, cuvek dinhmun ih thanglian a si ruangah “Ka suah ihsin lungawi ni ka nei lo in ka thei, nauhakte ka si lai ihsin nui dinhmun ah ka um zo” a ti.

A pasal thawn fate 44 an nei ruangah a pasal in ṭuanvo a la ngam nawn lo ih a tlansan, Mariam Nabatanzi cu a beidong cuang lo ih a fale pawl cu amahten a cawm thanglian thluh thei. Tu’ahcun a fapa upabik khal buaih a ngah ih an dinhmun khal a ziaum vivo thlang.

Be the first to comment

Leave a Reply

Your email address will not be published.


*