NUG In Rampum Huap Doawknak Thu A Phuang, Mipi Pawl Khal Ṭul Poimawh Tuk Lo Ahcun Vaksuak Lo Ding, Ei Le In Khawlcia Ding

September 7, 2021 ah National Unity Government in rampum huap doawknak thok dingin a phuang, mipi cozah a lalsal hlanlo doawknak cu nei vivo dingin theihternak an tuah. NUG President Duwa Lashi La in “February 1, 2021 ah Min Aung Hlaing ih kaihruaimi ralkap pawlin democracy cozah kutsung ih thuneihnak cu an rak lonsak.

Ralkap in thuneihnak an lak ruangah mipi cu riahsia in an um, mipi pawlin daiten lamzawhnak an nei cu meithal in an rak kap that. An kai ih an vuak, thubuai phunphun an orhter ih an kai, thawng an thlak. Ralkap pawl ih cangvaihnak cu thla 8 a kim zo.

Tui dinhmun ah ralkap pawl cu vengsung, biakinn, tlawnginn, siizung pawl ah umhmun an khuar vivo ih khuasung mipi pawl a phunphun in an hringhro. Mipi inn le lo an siatsuah ih an duhduh thilri an laksak, khua an urkang ih nunrawng zetin an cangvaihnak pawl cu leitlun mipi in an thei thluh.

Mipi pawlin daiten an rak tuar lawk nan san aum cuang lo ruangah a phunphun in an dokalh rero zo. NUG cozah in khuasung mipi pawl humhim dingin ṭuanvo kan nei ruangah September 7 ihsin ralkap cozah donak thu kan phuang a si. Tuiṭum dothlennak cu rampum huap a si ih mipi zaten in kan dotlang ding.

Mipi kilhimtu pawl khal nan kiangkap ih um ralkap le an kuthnuai ih hnaṭuantu pawl rak control tum uh. Ralkap in khua lal a ṭuanter mi pawl khal nan hna ihsin rak cawl hngal uh. Mipi kilhimtu PDF pawl, khuasung mipi, an inn le lo pawl kilhim uh. Khuasung mipi pawl khal tuisun ihsin ṭul poimawh tuk lo ahcun vaksuak hlah uh, rak humhim aw uh.

Ei le in, siivai pawl khal khawlcia uhla ralkap pawl ih thuhla cu a caan diktak ah PDF pawl hnenah rak sim thei tum uh. Tlangpar hriamkai pawl khal Min Aung Hlaing ih ralkap pawl rak do uhla nan ramsung cu rak control cio uh… Ralkap cozah cu a hrampi ihsin kan do dingih Myanmar ram cu zalen zetin kan kaihruai ding. Dothlennak ah nehnak kan co ding” tin a tarlang.

Be the first to comment

Leave a Reply

Your email address will not be published.


*