Nulepa Cawmtu Mino Cu Mipa 2 Bike Thawn An Phurawk Ruangah Tin Ralhrang Pawlin An Kap That

Ralhrang pawlin November 18, 2021 ah ramsung bike mawngdan daanthar an rak suah ih an daanthar cu “Bike pakhat ah mipa pahnih phurawk a ngah lo, nunau dungah mipa toin phurawk a ngah lo. Mipa dungah nunau to cun phurawk an siang. Nunau le nunau phurawk cu a ngah” tin daanthar 4 an suah.

Doawknak tualrawn deuh hmun ṭhenkhat ahcun himi daanthar hi an hmang rero zo. December 14, 2021 ah Sagaing, Shwebo khua ah mino kum 17 mi Ko Htun Lwin Oo le a rualpa cu bike in an phurawk ruangah ralhrang pawlin an rak kap ih bike mawngtu Ko Htun Lwin Oo cu a thi.

Tualsung mi pakhat in, “Ko Htun Lwin Oo ih semsuahnak khua cu Kawlin a si, Shwebo ah thilphur thilthiar in hna ara ṭuan ih a nulepa a cawm. Mino kum 17 mi lawng a si lai, bike mawngtu a si ih ralhrang pawlin an hmuh veten an kap that. A dungih to Ko Pyi Sone Oo cu an kai ih hmundang ah an hruai” a ti.

Kiangkap um mithmutu pawl khalin mipa pahnih bike thawn an phurawk ruangah an kap, thu khal an sut lo an ti. “An kahnak hmun hi check-gate khal asilo, ralhrang pawl cu hnipuan pangai in khuasung ah duty in an vak. Bike thawn phuraw mino 2 cu thu khal an sut lo, PDF tin rinhlelnak nei in an dingter lo. Hnaṭuannak ihsin tlung an si ih an hmuh veten an rak kap hngal, hitin ralhrang pawl an cangvai cu kan cohlang thei lo lawlaw” a ti.

Ralhrang in bike mawngdan daanthar an suah hnu ihsin Shwebo ramsung ah bike phuraw mipa 5 an kap that zo. An kaihmi Ko Pyi Sone Oo ih thuhla cu tutiang theih a si lo, a innsang pawlin an pehtlaih thei lo ih khuitawk hmun ah an hruai ti khal an thei lo.

Be the first to comment

Leave a Reply

Your email address will not be published.


*