Nunau Pakhat Cu Ramsa Hmuan Sungih Ngau Thawn An Duhawk Ruangah Ramsa Hmuan Lut An Siang Nawn Lo

Belgium, Antwerp Zoo ramsa hmuan sungih ngau tumpi le nunau Adie Timmermans an duhaw tin tulai thuthang ah a lar zet. Ngau cu Africa ramsung ih ngau a si ih mei nei lo pawl a si, cun kum 38 ih upa a si.

Adie Timmermans in ava tong ṭheu ih thlalang lenglam ihsin an pehtlaihaw ṭheu, blow kisses an peaw ṭheu ih ngau khalin a ngaina zet. Kum 4 sung an rak duhaw zo ih ramsa hmuan thuneitu pawlin Adie Timmermans cu an ramsa hmuan sungah lut an siang nawn lo.

Ramsa kiltu pawlin “Ngaucal Chita in a phunpi zawng pawl a duhdawt nawn lo, minung pawl ih an ra zoh ding caan lawng arak hngak ringring ṭheu. Zawng pawl khalin an phunpi vek ah an ruat nawn lo, an lakah tuahmawh awknak a suak pang ding ti kan phang ruangah Adie Timmermans cu ramsa hmuan sungah lut kan siang nawn lo” an ti.

Adie Timmermans khal a lungawi lo zet, “Khi ramsa hi ka duhdawt tuk, anih khalin in dutdawt ve. Kan duhdawt aw men ih thildang zianghman kan tuah lo, ziangruangah hitin in hrem ti ka theithiam lo.

Mi tampi in an va zoh ringring tho ih ziangah kei cu zoh an siang nawn lo, kan duhdawtaw men a si” tin a riahsiat thu pawl a rel. Asinan, ramsa hmuan kiltu pawlin ‘ramsa, zawng lakah buainak a suak pang ding ti an phang ruangah a si tin an simfiang ih ramsa hmuan ih lut cu an siang cuang lo.

Be the first to comment

Leave a Reply

Your email address will not be published.


*