Nunau Thla Kor Var Hruh An Ti Ṭheu Mi Hi Zo A Si?

Leitlun ramtinkim ah nunau thla kor var hruh an nei thluh. Tu ih na umnak khua le ram khalah nunau thla hnipuan var hruh hmutu an um men ding. Himi nunau thla kor var hruh hi zumdan dangdang aum.

Ṭhenkhat in accident ih thi, tuahthat, mah le mah thataw, nupi pasal ih bumnak ruangih thi pawl hi an thinhennak cu nunau thla kor var hruh vekin an lar’aw ṭheu an ti. Asinan ram ṭhenkhat ahcun himi nunau thla kor var hruh hi leitlun ih um thlarau vakvai phunkhat ah an ruat, ṭhenkhat asilen mi tidam theitu hringmi lak ih leng thlarau vakvai an ti.

Brazil ram ih an zumdan: Brazil ram ahcun nunau thla kor var hruh hi Dama Branca or Mulher de Branco tin an ko. Hlanlai ah nu note pakhat in nau a pai ih nau a hring laiah a thi, cutin a thla hi a riahsia tuk ruangah hnipuan var in a vakvai ṭheu an ti. Cumi ihsin thokin kor var hruh nunau thla hi an hmu ṭheu thu an rel. Fala, nunau uire tivak an that caan ah himi nunau thla kor var hruh hi an hmu ṭheu.

Canada mipi pawl ih thuanthu: Hlanlai ah fala le tlangval duhdawt aw zet an rak um ih tlangpar ah an toaw ṭheu. Neiaw dingin ziangkim an relrem thluh zo, fala in an neihawknak ih a hruh ding mi mokor khal a tuah thluh zo. An neihawk ni a thleng hlanah British ralkap pawl thawn an doaw ciamco ih a duhdawt zetmi a tlangval cu doawknak ah a thi.

A tanta mi a fala cu lungkuai in aum ih mokor a hruh hnuah an rak tongawk ṭheunak tlangpar ihsin a dawp that. Cutawk hmun cu Chute de la Dame Blanche (White Lady Waterfall) tin an ko lanta ih nunau thla kor var hruh an hmuh tinten himi thuanthu hi an mangsuak ṭheu.

Japan ram ahcun camsiatmi thla an ti. Cun mithi ruak hi hnipuan var white kimonos in an phum cih ṭheu. Japan pawlin nunau thla hnipuan var hruh hi an rak uar cuang ruangah zuknung khalah an cang rero ih nunau thla kor var hruh hi leiltun ah a lar phah zet.

Be the first to comment

Leave a Reply

Your email address will not be published.


*