Nupi A Nei Zikte Ih Mopuai Sawmnak Ca Ava Pek Laiah An Rak Kap That

Mandalay, Sint Kue khua ih um tlangval Kyaw Kyaw Myo cu June 24 ah nupi nei ding a si. June 20 zanah a rualpa thawn mopuai sawmnak ca an va zem.

Letpanhla tlawnginn kot an thleng zawng ah ralkap pawlin an rak kap ih Kyaw Kyaw Myo cu a hmun ah a thi cih. A rualpa cu an kap ngah lo nan an vel ciamco ih an kai.

An sungkhat pakhat in “Tlawnginn sungah ralkap pawlin umhmun an khuar, tlawnginn kiangih an feh men cu an rak kap that. A rualpa cu an kap ngah lo nan an vel ciamco hnuah an kai.

Kyaw Kyaw Myo ih ruang cu laksuah an siang hrih lo ih vui hngal dingin in fial. Mopuai sawmnak ca a tuahter nak dawr thotho ah vuinak caanserh kan hmangdan ding ca kan va tuahter cu kan dinhmun a sia tuk” a ti.

Kyaw Kyaw Myo cu mifel le miṭha zet a si ih a nupi neihnak ni cu a hngakhlap zet nan tuvek thil an tong cu a poi tuk, a fala khal lungkuai riahsia in a ṭap rero.

Be the first to comment

Leave a Reply

Your email address will not be published.


*