Nupi Fanau Cawmtu Innsang Pabik Cu Bomb Kammi Dai Ngah Ruangah A Thi

Shan State, Kawnghuong khua ih um kum 40 mi U Ba Shwe cu innsang cawmtu a si. March 26, 2022 zinglam nazi 6:00 hrawngah tlanglo hnaṭuan dingin a feh ih a dailennak ah bomb kammi a dai ngah ruangah a nunnak a liam.

A nupi le a fale 2 in cawmtu an nei nawn lo ih an harsa zet, khuasung mipi pawlin an ei le in ding an pe. An khuami pakhat in, “Zingpit ah lo hnaṭuan dingin a fehsuak. Lo a thlen hnuah dailen dingin a feh ih bomb kammi a dai ngah ruangah a puak ih a thi.

A hliamhma tuar khal a nasa tuk, simlam ah kan vuiliam hngal. Bomb kammi cu leitlun sungih phunmi a si lo ding, leilung sungih phummi sisehla cun a ke a bul ding. A dailen laiah a kut in a dai ngah a si ding, a kut pahnih in a siat thluh” a ti.

U Ba Shwe tei innsang cu nikhat ṭuan ih nikhat eicop hawl an si, a tantami a nupi le a fanau cu khuasung mipi pawlin an theitawk in an bawm. Asinan an khua ah mi neinung zohman an um lo ruangah hmun dangah bawmnak hawlsak dingin an tawlrel rero lai. An khua kiangkap ah hriamkai pawl an kapaw ṭheu ruangah khuasung mipi pawl khal an vahsuah tikah ralringten tlangleng dingin theihternak an suah.

Be the first to comment

Leave a Reply

Your email address will not be published.


*