Olympic Ah Uganda Ram Aiawh Ih Teltu A Hlo, A Hlohnak San A Ngan

Olympic Games Tokyo 2020 cu Japan ramah an tuah rero lai, July 2021 ihsin August 8 tiang an nei ding. Cutawk ah Uganda ram aiawh ih teltu kum 20 mi Julius Ssekitoleko cu a hlo.

Julius Ssekitoleko cu thilrit khai zuamawknak (weightlifter) ih tel a si. Asinan, nehnak a co lo ruangah July 20 ah an ram Uganda ih tlungsal ding an si nan a hlo thutthi.

A hlohnak san cu “Africa ram ih um cu a har tuk, Japan ramah ka um lanta” tin a ngan. Cun, a team pawl hnenah a hnipuan, thilri pawl cu a nupi hnenah rak pe uh tin a fial.

An coach le a team member pawl cu July 20 ah an tlung nan a telve lo. An hmuh netabik cu July 16 zanlam nazi 6:00 ah a si, cutawk ahcun an thlennak Izumisano hotel ah aum lai.

Nagoya khua fehnak ding bullet train ticket a lei ti cu an thei, Japan palik pawlin an hawl rero nan an hmu thei hrih lo tin CNN thuthang ah an tarlang.

Covid-19 a test-nak ding a sample khal a ap hrih lo ti an thei, Ugandan Weightlifting Federation president Salim Musoke in a biak netabik cu July 13 sunah a ti.

Salim Musoke in “Ram aiawh ih lektu a hlo ti cu ram hrangah a ṭha lo, Japan cozah in an hmuh lohli theinak dingah thlaza ka cam. Leknak ihsin kan ban hngal ding a si, kan rel ṭheumi security pawl teh an um lo maw si?” a ti.

Cun, zuamawknak khalah neh lo dingin aum hrim si an zum. Tuitiang cu an hmu thei hrih lo ih an hmu asikhallen an ram ah an kuat hngal lo ding, Japan ramsung ih um a si zo ruangah Osaka authorities in thilumdan pawl zingzoinak an nei lawk ding thu an phuang.

Be the first to comment

Leave a Reply

Your email address will not be published.


*