Online Parih Ca Tar Mi Ruangah An Kai

Taninthayi, Myeik Township, Zeyar Thiri vengsung ih um fala pakhat cu May 29 sun ah ralhrang pawlin an kai. Ralhrang pawl cu uniform an hruh lo, ralthuam kimcang an keng thepthep. An kaihmi fala cu Zinmar Win timi Facebook account hmangtu a si. Himi Facebook cahmai ihsin ralhrang ṭhahlonak a ngan ṭheu, ralhrang pawl thuhla an post mi arak share-sawng ṭheu tin ralhrang pawlin an va kai.

Vengsung mi in, “An inn sungah an va lutchilh ih innsung ih um midang cu an suahter thluh. Online parih a ca tar mi ruangah an kaih thu a innsang pawl hnenah an sim thei” a ti. An kaihmi fala cu pukmah 505 in thubuai an orhter.

Thudang: Ramlak Ah Thailand Mi Mithi Ruak An Hmu, Myanmar Mi 100 Lenglo An Kai
June 1, 2022 zinglam ah Thailand, Hat Yai ramlak ah mithi ruak an hmu. Mithi ruak cu Thailand pacang kum 40 mi Maddol Binsan a si. Ramlak ah nga sio dingin a poksuak ih a hlo, a ruak cu an hawl ih mi kuttuar ih thi ti an thei. A kut le ke cu hridai in an tawnbet ih a kaa khal puansia in an khuh hnuah an phum. Thailand palik pawlin mithi ruak cu an hmu ih hliamhma a tuar ti an thei.

Ramlak ah zingzoinak an tuah hngal ih ramlak ih relh Kawlram mi 109 cu rinhlel thu in an kai, Malaysia ram feh tum an si ih ramlak ihsin an hngak lai. Myanmar mi pawl cu thuhla an sut rero lai. Khua upa in, “Ramlak ih um raltlan pawl hi an rinhlel um bik. Maddol hi miṭha le mifel zet a si ih midang thawn buainak an nei dah lo. Miharsa pawl bawm ṭheutu a si. Kan khua mipi pawl cu ramlak ih hnaṭuan an si ih mithi ruak kan sar ruangah ramlak ih hnaṭuan ding khal an ṭih thluh” a ti.

Be the first to comment

Leave a Reply

Your email address will not be published.


*