Paa Eisual Ruangah Nauhak Unau Hnih An Thi, Innsang Nubik Khal A Besia

Kachin State, Puta-O, Sar Khum Dam khua ih um nauhak unau hnih in paa an eisual ruangah an nunnak a liam, innsang nu bik khal a besia ih siizung ah an tuamhlawm rero lai. April 6 ah nauhak unau hnih in an tlawnginn kiang ta paa an la ih an paa lakmi cu tursia nei pawl arak si.

An sungkhat in, “Nauhak mipa le nunau in tlawnginn kiang ta paa an la ih hringtu nu cu an suangter. An pathum in paa cu an ei ih zinglam nazi 3:00 hrawngah an luak ciamco, an luak rak eitu an uico hi a thi hmaisabik.

Nauhak pahnih cu oxygen pek ṭul an si, April 9 zanlam ah an fanu in a thihsan. April 9 zanṭim laiah an fapa in a thihsan, innsang pabik in a ei ve lo” a ti. Kum 7 mi nunau le kum 4 mi mipa nauhak ih ruak cu an vuiliam zo.

Innsang nubik Daw Khin Htay Kywe cu tlawng sayama ṭuan rero lai a si, a dinhmun a sia tuk ruangah April 12 ah Myitkyina Public Hospital ah an phur ding. Daw Khin Htay Kywe tei innsang cu Sagaing peng, Mingin khuami an si ih Kachin State, Sar Khum Dam khua ah tlawng sayama ṭuan dingin an vai.

Kan dung March thla khalah Puta-O khuami U Yin Thang Sin le a rualpa in paa an eisual ruangah an nunnak a liam. Leilung tlun ah paa hi cii thawngkhat lenglo aum, cumi lakah paa cii 50 hrawngin tursia an nei. Ṭhenkhat paa tursia nei pawl cu an ṭihnung um tuk ih minung nunnak tam zet an laksak zo.

Be the first to comment

Leave a Reply

Your email address will not be published.


*