Pacang 2 Cu Ralhrang Pawlin NLD Thantar An Hmuh Ruangah Meithal In Vei 30 An Kap

Sagaing Division, Kyunhla le Ayeyarwaddy ramsung ah ralhrang pawlin khuasung mi pathum an that hnuah an khua khal an urkang thu tualsung mipi pawlin media hnenah an sim thei. November 20, 2021 ah ralhrang pawl cu Ohn Shit Kone khua sungah an va lut ih PDF pawl an hawl.

U Aung Myint le Ko San Ni tei inn ah an va lut ih NLD thantar an hmuh ruangah an hruaisuak. An kut cu hridai in an tawnbet veve ih khawleng lamah an hruai ih an kap that hnuah an phum hngal. Tualsung mi pakhat in, “Kan khuami pahnih cu meithal in vei 30 an kap ih an that, lei an lai ih an phum cih.

An hmin cu U Aung Myint (kum 48) le Ko San Ni (kum 33) an si, innsang nei veve an si ih innhnen aw, hmuancar aw an si. An nupi fanau pawl mual an liamsan, an ruak khal hmunkhat ah an rak phumtlang. Khuasung mi pawlin an ruak cu kan va phorhsal ih ṭhaten sakhuadan vekin kan vuiliam” a ti.

Cuvek thotho in Ayeyarwaddy ramsung ih um Ko Htoo Naing khal ralhrang pawlin an that. Ralhrang 100 hrawng cu an khua sungah an va lut ih mipi kilhimtu pawl an hawl rero nan an hmu lo, cutin cet tuahtu Ko Htoo Naing cu PDF ih an rinhlel ruangah an kai ih an vuak, an hrem ciamco.

An khawleng ah an hruaisuak ih lilawn parah an vuak ciamco hnuah an kap that, a ruak cu tiva ah an hlon. Ko Htoo Naing ih ruak cu khuasung mipi pawlin an hawl rero nan tutiang an hmu thei hrih lo, Ko Htoo Naing in a nupi le a fale pahnih a thihsan. Hitin ralhrang pawlin khuasung mi pathum an that hnuah khuasung ih inn ṭhenkhat an urkang ih mipi cu hmundang ah an tlan thluh.

Be the first to comment

Leave a Reply

Your email address will not be published.


*