Pacang In Fala A Pawngsual, Pacang Cu Hremnak An Pe Lo Ih Fala Sawn Hremnak An Pe

Shan State, Kutkai Township, Ho Naung khua ah pacang fa 2 nei zo in tualsung fala kum 21 mi a pawngsual nan pacang cu hremnak an pe lo, fala sawn hremnak an pe. Nikum June 2021 ah fala kum 21 mi le a unu tei nupa cu tlanglo ah hnaṭuan in thlam ah an riak.

Zankhat cu a unu tei nupa hi thlam ah an riak lo, cutik laiah pacang kum 27 mi Giot Dae cu an thlam kiangah ava feh ih a unu ih pasal cu a ko. Thlam sung ihsin a unu tei nupa an um lo thu a sim, pacang cu thlam sungah ava lut ih a duh lo nacingin a sualpi.

A kaa a huhsak ih a sualpi hnuah midang hnenah relsuak lo dingin a hringhro. Falanu cu nau a keng, December 18 ah tualsung mipi pawlin nau a keng ti an theih ruangah hremnak an pe. Tualsung mipi pawlin thu an sut ih pawngsualtu cu Giot Dae tin a sim.

Giot Dae in fa 2 nei a si ih ṭuanvo a la lo ding thu a sim thei ih a hringhro. Tualsung mipi pawlin pacang cu hremnak an pe lo, fala naupai sawn hremnak an pe ih sawrfung in a ke ah an vuak hnuah khua ihsin dawisuak an tum.

A unu in ngaithiam a dilsak ih khua ihsin dawisuak lo dingin a ngen, a unu tei in sumpai ting 4 an kuansak hnuah khuapawn thlam ah an umter. Thla 3 sung cu khualeng ah aum ih harsa zetin ramlak ah nau anei. Nau a neih hnu kan dung April thla lawngah khuasung ah an umter.

An khua mipi pawlin an thuhla cu an thuhsak. Ta’ang Women’s Organization (TWO) pawlin an khua kiangkap ah zirnak, training an va pe ih cutawk ah Ho Naung khua ih thilthleng cu an thei. TWO hotu in hmuhsuam tong fala cu ava bia ih an thuhla cu an buaipi.

TWO ṭuanvo neitu in, “Kutkai ramsung ah nunau pawl hi pawngsual an tong ih nau an pai asilen pawngsualtu aiin pawngsual mi in hremnak an tong sawn. An nautat ih an hmuhsuam, thilṭha lo zet a si. Pawngsualtu mipa pawl hi hremnak pe sawn ding an si” a ti. Tualsung mipi ralkap TNLA pawlin an thuhla cu an thei ih pacang Giot Dae cu an va kai.

Be the first to comment

Leave a Reply

Your email address will not be published.


*