Pacang Nupi Nau Nei Zikte An Kap That Ih Ralkap In ‘Inn Kan Theihsual Ruangah A Si’ An Ti

May 30 zinglam nazi 10:45 ah ralkap tam zet cu Mandalay Division, Bagan khua, Mhan Cho vengsung ah an va lut ih mino 6 an kai. Dalan in ‘Meithal an nei’ tin a hek ruangah an kai.

Pacang Moe Myint Aung khal kaih an tum ih inn sangka arak khar, ralkap pawlin an inn sangka cu an kap siat ih innsung ih um Moe Myint Aung an kap ngah. A pum ah an kap ngah ih a hliamtuar loin a thi.

Vengsung upa in “Dalan in meithal an nei tin thuthang dik loin a report ruangah mino pawl cu an kai ih an vua ciamco. Mino 6 an kai ih Moe Myint Aung cu an kap that, a nupi nau nei zikte a thihsan. Hnaṭuan felfaite ṭuan ih ei hawl an si, tutiang a ruang kan ngah hrih lo” a ti.

Ralkap in zingzoinak an nei rero hnuah “Inn kan theihsual ruangah a si” an tiih an kaihmi mino 6 cu a zan ah an suahsal, mithi ruang khal an innsang hnenah an pesal.

Moe Myint Aung ih nupi nau nei zikte cu a pasal ruang parah a ṭap rero, pa nei loin an fate a piang ding ti a ruah tikah a lungzur mitthli a luang.

Vengsung mi pakhat in “Mizan ih an kaihmi mino pawl an suah thluh sal. An zaten hliamhman an tuar, ralkap pawlin inn kan theihsual ruangah a si an ti. An kaihmi pawl an suahsal nan Moe Myint Aung cu a thi, a innsang pawlin an tuar thiam lo.

A nupi nau nei zikte a thihsan, inn theihsual ruangah kah that kherkher a ṭul maw si? Moe Myint Aung ih thihnak thuhla ah ṭuanvo latu ding an um lo” a ti. Kum 27 mi Moe Myint Aung ih ruang cu tuizing May 31 zinglam nazi 10:00 ah an vuiliam.

Be the first to comment

Leave a Reply

Your email address will not be published.


*