Pacang Pakhat Cu A Motor Thawn A Hlo, A Hlohnak Hi Thlakhat A Kim Zo Ruangah A Innsang Pawl Cu An Thinhar Zet

Shan State, Mong Naung le Kholam karlak lamzin ah pacang pakhat cu a motor thawn a hlo ih a sulhnu hmuh ding zianghman aum nawn lo ruangah a nupi fanau pawl cu an thinhar zet. September 29, 2021 ah pacang Sai Wan cu amahten motor thawn Nam San khua lamah ava feh, cutin Mong Naung le Kholam karlak lamzin ah a hlo.

An sungkhat in, “Nam San khua feh dingin motor thawn a poksuak, Mong Naung khua tiang cu kan phone thei lai. Cumi hnu minute 20 hrawngah kan besal tum ih a phone hi a tlang thei nawn lo. Cutawk ihsin tutiang kan pehtlaih thei nawn lo” a ti.

Sai Wan cu mi pangai a si ih ramkhelhnak thuhla khalah a tel dah lo, a nupi thawn fapa kum 10 hnuai pahnih an nei. An sungkhat cun, “Ka thinphang zet, kan theitawk cun mi dangdang thu kan va sut vivo nan zianghman an thei ve lo. Hriamkai pawlkom pakhat khat in an kai si ding ti an zum bik.

Sai Wan cu mi pangai a si ih ziang hriamkai pawlkom khalah a tello, zo pawlin an kai ti khal kan thei lo. A nupi khal a thinhar tuk, a hloh ni ihsin tuini tiang a thuhla kan thei nawn lo. A thi maw, a nung ti khal kan thei lo, fapa pahnih kum 10 kim hrih lo anei ih an seherh um zet. Hriamkai pawlkom pakhat khat in an kai asikhallen a thuhla tal cu in sim sehla kan duh zet” a ti.

Mong Naung le Kholam kiangkap ah Shan Armed Forces, tualsung hriamkai le ralhrang pawl an vak sukso ṭheu. Tualsung hriamkai pawlin himi lamzin ih feh pawl hnenah sumpai an rak dil ṭheu, hitawk hmun ih hriamkai pawlin khua pakhat ah mi pathum cu an pawlkom ah lut dingin an fial. Shan ramsung ah hriamkai pawlkom tam zet an um ih ṭhenkhat cu ralhrang kuthnuai ihsin an cangvai.

Be the first to comment

Leave a Reply

Your email address will not be published.


*