Pacang Pakhat Cu Khua Dangah Hnaṭuan In Aum Ringring Ih A Hlawhtling Hnuah Kutdawh Putar Vekin Inn Ah Ava Tlung Cu >>>

Liu Muhai le a nupi in fapa 3 an nei, a nupi in a thihsan hnu ihsin khua dangah hnaṭuan in a khuasa. A fale pathum cu a pilepu hnenah a tanta ih sumpai a kuat ṭheu. Taima zet ih hna a ṭuan hnuah a hlawhtling zet ih milian zet ah a cang nan a fale pawlin a thuhla cu an thei lo.

A fale pawl cu nupi an nei thluh ih inndang an tlei, Liu Muhai khal kum 70 a kim thlang ih a caan neta lam a si zo ti a theihawk ruangah an khua ah ava tlungsal. Asinan, a fale kiangah aum dah lo ruangah a fapa pawl ih thinlung put theih a duh ruangah an khua a lut hlante ah a hnipuan pawl a thlengaw thluh.

Cenbek a hnihaw ih kutdawh putar vekin aum, an khuapawn ih um inn pakhat hnenah a fale pawl ih inn umnak a sut thluh ta, cutin a fapa upa bik tei inn ah ava feh ih an sangka cu a king. A fapa upabik in sangka ava ong ih “Ka fapa, na pa ka ra tlung zo” a ti.

A fapa cun a lu ihsin a kezim tiang a zoh rero hnuah “Hey, kutdawh putar. Ziangtin ka pa vekin lem na ra cang ngam, na ningzak lo maw si. Ka pa cu khawpi ah aum ih milian zet a si zo” tin a dawisuak.

A fapa pahnihnak inn ah ava fehsal ih sangka ava king, a fapa in sangka ara ong ih “Ka fapa, na pa ka ra thleng” a ti cu mangbang tukin a zoh ringring lawk. Reipi a zoh hnuah “Ka lo thei lo, tlan hngal aw” tin a nam. A pa in “Ṭhaten in zoh awla na pa ka si hi. Ka sumdawngnak ka tlasia thluh ih tui dinhmun ka thleng” a ti.

A fapa cun “Na sumdawngnak a siat ruangah ziangah na ra tlung. Hmun dangah tlan aw” tin sangka cu napin a khar puppi. Hringtu a pa cu a riahsia tuk ih a fehnak lamtluan ah a mitthli a fawr vivo, a fapa 2 ih thinlung put cu a theifiang zo.

A fapa nauta bik inn ah ava fehsal ih “Ka fapa, na pa ka ra tlung” a ti cu a fapa in a zoh ringring hnuah mitthli thawn a pom. “Ka pa, ziang na cang? Inn sungah ra lut aw” a ti, a nupi hnenah tidai rak suang awla ka pa hi tak a kolh duh ding. A rilrawng ding ruangah bazar ah rawlhmeh ka va lei lohli ding” tin a poksuak.

A pa cu tihlum in tak arak kolh aw, a fapa in ngasa le sa dangdang a lei hnuah inn ah ava tin ih rawl thaw zetin an suangsak. Hringtu a pa cu a lungawi tuk ih “Ka fapa, ka sumdawngnak ka tlasia thluh ih zianghman ka nei nawn lo. Cuti cingin in cohlang lai maw?” tin a sut.

A fapa in “Ka pa, ka sentet lai ihsin in rak cawm thangliantu na si. Na tar hnuah lo cawmtu ding ka si, zianghman lungphang hlah aw. Tu ihsin cun kan inn ah na um ringring ding” a ti. A mo khalin “Ka rang, hnangamten um aw. Sumpai in rak kuat ṭheumi zarah sumdawngnak tla kan tuah thei phah, kan lo kilkhawi ding caan a thleng zo” arak ti ve.

Putar cu a lungawi tuk ruangah a mitthli a tla ih a bag sung avun ong cu sumpai tampi arak um, “Ka rak khawl rero mi sumpai pawl a si, US $136,084.00 (880,000 Yuan) lenglo a si. Nan kut ah ka lo hlan, kei cu ka ni tlak lam ka nai vivo ruangah ka hrangah san aum nawn lo” a ti.

A fapa in “Ka pa, in rak cawm rero zo ruangah himi sumpai cu kan ṭul nawn lo. Ka upa zo ih hna khal ka ṭuan thei zo. Ka upa 2 hnenah pe sawn aw” arak ti. Asinan, a pa cun a ule pahnih ih thinlung put a theih zo ruangah a pe duh lo, ziangkim a simfiang hnuah a fapa nautabik hnenah a pe ih a fapa khalin a netnak ahcun a cohlang. A fapa 2 in a pai thuhla an theih veten ngaithiam an va dilsal nan a pa in arak ngaithiam nawn lo ih sumpai khal zianghman a pe duh nawn lo. (China thuanthu pakhat a si, Good Times ih an tarlang mi a si)

Be the first to comment

Leave a Reply

Your email address will not be published.


*