Pacang Pakhat Cu Ralkap Pawlin A Fahniang An Hrem Nasa Tuk Ruangah A Tuar Thei Nawn Lo Ih A Thataw

Bago Division, Pyay District, Paungde khua ih um pafa cu September 13 ah ralkap pawlin an va kai, Mytel ban pawl an siatsuah tum tin thubuai an orhter ih an kai. A fapa cu ralkap pawlin an hrem nasa tuk ruangah a pa in a tuar thei nawn lo ih a thataw tin a tanta mi a innsang pawlin media hnenah an sim thei.

Paungde khua ih um U Toe Gyi tei pafa cu Mytel towers pawl an siatsuah tum tin an kai, motor thawn ralkap sakhan lamah an phur. Lamzin tluan ah nasa tukin an vel ciamco, ralkap sakhan an thlen hnuah thu an sut ciamco. A fapa cu inn parah thu an sut ih U Toe Gyi cu innhnuai ah thu an sut.

U Toe Gyi khal nasa zetin an hrem nan a fapa hi an hrem nasa sawn. A fapa cu zanvar in an vuak, an hrem ruangah an au rero, a ṭap. A fapa ih au-aw cu zanvar in a thei ih a ningna tuk, September 14 sun ah U Toe Gyi cu an suahsal nan a fapa cu an suah ve lo ih an hrem rero lai.

U Toe Gyi cu inn a thleng hnu khalah a hna sungah a fapa ih au-aw, ṭap thawm cu a cam ringring lai. Inn a thleng hnuah U Toe Gyi cu a ciangkuang nawn lo, a fapa suak dingin in bawm hram uh tin amahten a phun rero ṭheu. Cun amah khal ralkap pawlin in ra kaisal ding tin a phun sekso ṭheu, an sangkate kiangah a to ringring ih lamzin lam a cuan ringring.

A fapa ra tlung ding hngak vekin lamzin cu a zoh ringring. September 19 sun ahcun an khua ih phungyi tlawnginn kiang ramlakah a thataw. Thilhriam zetin a hngawng ah a at’aw ih a thi, a hngawng a at’awk hlanah hridai in a thlaiaw that tum ih hridai a cat ruangah a hlawhsam ti a sulhnu ihsin an theithei.

A kiangnai thingkung parah a thlaiawk that tumnak hridai cat an hmu. U Toe Gyi cu mi tlaitlung zet a si ih veng sungah buainak a tuah dah lo, amah le mah a thataw ti cu a innsang le khuami pawl khalin a sulhnu ihsin an nenhnget.

An sungkhat pakhat in, “Ara suah ihsin ka fapa hi runsuak uh, ka fapa ka hmu duh. Ka fapa in harsatnak a tong rero zo a ti ringring, amah khal ralkap pawlin in ra kaisal ding a ti. September 19 sun ahcun a thataw, ahmaisa ahcun hridai thawn a thlaiaw tum ih a hlawhsam.

Cumi hnuah nam vek ih thilhriam zetin a hngawng ah a at’aw ih a thi, a thuhla cu vengsung mipi pawlin kan thei thluh ih kan riahsia tuk. A poi tuk rori, ralkap thusutnak ah ziangtluk in an rak hrem nasa ding ti cu kan ruatsak thei” a ti.

U Toe Gyi ih ruak cu September 19 zanlam nazi 3:00 ah an vuiliam, a ruak vuinak khalah ralkap pawlin a fapa cu an suahter lo. U Toe Gyi a thih hnuah a nupi in a fapa cu tong ava tum nan ralkap pawlin an rak siang lo, a thi maw a nungdam lai ti khal an sim duh lo ruangah an innsang pawl cu an thinhar tuk.

Be the first to comment

Leave a Reply

Your email address will not be published.


*