Pacang Pakhat In ‘Ka Fale Pawl Ei Dingah’ Tin Tat (Lamkhuang) A Lo Ih Thingkung Par Ihsin A Tla That

Shan State, Kyaukme khuami ih um pacang pakhat cu tat (lamkhung) kung parah ava kai ih vanduai thlak zetin a tla that. Kyaukme, ahmat (11) vengsung ih um kum 30 mi pacang hi nupi fanau cawi lai a si.

A nupi thawn fate 4 an nei, a fale 2 cu phir unau an si ih thla 6 mi lawng an si. Pacang hi an innsang cawmtu bik a si. Lo hnaṭuan in a innsang pawl a cawm. June 30 sun ah lo hnaṭuan dingin a poksuak, zanlam nazi 5:00 hrawngah an ṭin ih lamlak ah lamkhuang a lo phah ih cansualnak a tong.

A ruak buaipitu in, “Man Win khua lamah lo hnaṭuan dingin an feh. An tlun lamah lamkhuang a lo phah. Lamkhuang kung parah a kaiso ih ruah a sur nasa zet. Ka fale pawl ei dingah tin lamkhuang pumthum a lo, cumi hnuah midang laksawng pek dingah tin lamkhuang dang a lo tumsal.

Ruah a sur nasa tuk ruangah a rualpa in duhtawk dingin a sim nan a duh lo. Thingṭek dangih a kai zawn ah a tla, ruahsur ruangah a nal ih a tlasual. A tlak hnu khalah a ṭong thei lai, ‘ka kut a naa tuk’ a ti. Cumi hnuah a thi cih” a ti.

Lamkhuang kung par ihsin a tla naa tuk ruangah a kutruh a kiak ih a sunglam khal a siatsuah. Innsang cawmtu bik in a thihsan ruangah a innsang pawl cu an harsa zet.

Be the first to comment

Leave a Reply

Your email address will not be published.


*