Paing Phyoe Thu In, “Dothlennak Ah Kan Neh Hlanlo Inn Ah Ka Tlung Lo Ding” A Ti

Kum 31 mi Paing Phyoe Thu (Victoria) cu Myanmar lemcan thiam le model hminthang zet pakhat a si. Yangon khawpi ih um a si, 2017 kum ah Myanmar ramsung ih lemcan thiambik laksawng Academy Award a ngah.

Ralkap in Myanmar ramsung thuneihnak an lak veten lamzawhnak ah a tel, lamzin par le online sung ihsin ralkap cozah cu a dodal. Curuangah April 2, 2021 ah ralkap pawlin kai dingin pukmah 505 (a) hmangin thubuai an orhter, hmunhimnak ah aum zo ih aumnak hmun ihsin ralkap pawl cu a do rero lai.

Paing Phyoe Thu in inn lam tlung ding lawnglawng ruattu pawl cu a zahpi ih “Dothlennak ah nehnak kan co hlanlo inn ah ka tlung lo ding” tin a facebook cahmai ah a tarlang.

Paing Phyoe Thu (Victoria) in, “Kan tuarnak lawng kan ruat ih thu kan ruatsual. Inn ah hnangamten ka umsal thei kem maw, ka innsang pawl thawn kan tongaw sal thei kem maw. Ka hna teh ka ṭuansal thei kem maw, ṭhenkhat cu an nunnak an hlan zo.

Ṭhenkhat cu ramlakah an um, ṭhenkhat cu ziangkim tlansan in meithal an keng. Ṭhenkhat cu thawnginn sungah an um, inn an tlung thei nawn zik lo. An innsang pawl thawn an ṭhenaw thluh zo, an duh zet mi an hna khal an ṭuan thei nawn lo ding tiih ruattu pawl cu ka lo zahpi tuk. Mi phatsantu cu ka si thei lo, dothlennak ah nehnak kan co hlanlo inn ah ka tlung lo ding” a ti.

Be the first to comment

Leave a Reply

Your email address will not be published.


*