Paing Takhon An Suah Ve Lo Ruangah A Farnu In “Manisun Ahcun Ka Nu Cu A Aipuang Tuk Nan Tuisun Ahcun A Ṭap Rero” A Ti

June 30, 2021 sunah ralkap in thawngtla 2000 lenglo an suah zalen, asinan CDM tuah cozah hnaṭuan, lawyer, NLD upa le thuthang latu ṭhenkhat cu an suah lo. Kachin pacang pakhat khal a fanu neihsun an suah ve lo ruangah lungkuai in a thih phah.

Kum 24 mi Myanmar singer, actor le model hminthang Paing Takhon cu thawnginn ihsin an suah ve tin thuthang aum nan a innsang pawlin a tello thu an relfiang. Paing Takhon cu ralkap cozah dodal in lamzawhnak ah arak tel ṭheu, ralkap pawlin 505 hmangin kaih an tum ih hmun dangah a tlan.

Cutin a damlo bese tuk ruangah April 8 sun ah a thupten inn ah ava tlung lawk ih ralkap pawlin an rak kai. Damlo cingin an kai ih tuitiang an suah hrih lo.

A farnu May Chit in “Kan innsang cu kan hlim lo tuk nan innsang dang pawl an hlimlai ka hmuh tikah lungawi in ka mittla arak tla ve. A caan leh surprise in tuah tum ruangah an suah lo a si ding tin miaa vekin thu ka ruat. Manisun ah ka nu cu a aipuang tuk nan tuisun ahcun a ṭap rero.

Mani zinglam ahcun kan innsang cu kan buai vutvo. Umngaihnak khal thei lo in kan phar rero nan tuisun ahcun kan dai reprep. Ka nu a ṭap rero ruangah a thinhar tuk pang ding tin thinhar lo vekin ka um ih ka lem, thinhar lo vekih ka um caan hi a sau tuk zo ih ka bang ve zet” a ti.

June 30 sunah Myanmar milar pawl khal an suah zalen thluh ding tin thuthang aum nan 2 lawng an suah, an suahmi milar 2 cu Actress May Toe Khaing le Makeup Artist May Oo Maung an si.

Midang an kaihmi milar hminthang pawl cu Paing Takhon, Director Min Htin Ko Ko Gyi, Comedian Zarganar, Singer Saw Phoe Khwar, Actor Pyay Ti Oo, Indra Kyaw Zin, Lu Min, Singer Po Po, Beauty Blogger Win Min Than le Ye Deight (ရဲတိုက်) pawl cu Insein thawnginn ah an um lai.

Be the first to comment

Leave a Reply

Your email address will not be published.


*