Pakokku Ih Fimthiamnak Hotu Cu Bazar Kai Dingin A Feh Lamah An Kap That >>>

Magway peng, Pakokku ramsung ih fimthiamnak hotu nunau cu March 5, 2022 zinglam ah zo ti theih lo pawlin an kap that. District Education Officer, Daw Tin Tin Yee cu zinglam nazi 7:00 hrawngah bazar kai dingin bike thawn a feh ih lamzin ah mipa pahnih in an kap that.

Tualsung mi pakhat in, “Bike a mawng laiah a dunglam ihsin an kap, ambulance an ko ih siizung ah an phur. Asinan, an kahnak hmun ah a thi zo” a ti.

Kum 59 mi Daw Tin Tin Yee cu ahlan ah Township Education Officer a si. Ralhrang in thuneihnak an lak hnuah an khaisang ih District Education Officer a ṭuan. CDM tuah tlawng saya / sayama pawl khal a hringhro ṭheu.

Daw Tin Tin Yee kap thattu cu an kai ngah lo, ralhrang pawlin bike mawng mi pahnih phuraw an hmuhmi cu thusutnak an nei vivo. Pakokku lamzin hmunkip ah ralhrang pawl an um thluh ih Daw Tin Tin Yee kap thattu cu an hawl rero lai.

Be the first to comment

Leave a Reply

Your email address will not be published.


*