Pale-PDF Pawlin Ralkap 30 Lenglo An That, Mithi Ruak Phur Ralkap Motor Khal An Rak Kap

Sagaing, Pale ramsung ah Pale-PDF le hriamkai pawlkom dangdang an komaw ih thuneihnak latu ralkap pawl an do ciamco. October 11 sun ah veithum rori an doaw ih ralkap lam 30 lenglo an thih thu theih a si. Zing nazi 8 ah ralbawi telin ralkap pawl cu Kyauksalin tlang lak lamzin ah an feh timi thuthang an thei.

Ralkap pawl cu motor 23 in an vakkual, Pale-PDF le hriamkai pawlkom pahnih an komaw ih lamzin ah bomb an rak kam. Ralkap pawlin bomb kammi an pal puak veten meithal in an kap ciamco hngal. Ralbawi ih tonak motor khal a puakdarh thluh ih a lu ah hliamtuar in a thi, ralkap ruak 5 cu a hmun ah an phum.

Hliamhma tuar khal tam zet an um ih hmun dangah an phur. Cun, zinglam nazi 9:00 hrawng ah ralkap 30 cu Nakaa tlang parah an kaiso ih Pale-PDF le hriamkai pawlkom 6 komaw in an rak bawh, an rinlo laitak ah an kap ciamco ih an zaten deuh thaw an thi.

An meithal le an ralthuam pawl an va lak hlanah dunglam ihsin ra ralkap motor in bomb le pukpi in an run kap ciamco ruangah mipi kilhimtu pawl cu dung an sip.

Ralkap pawlin mithi ruak le hliamtuar pawl cu motor in an phur, Nakaa tlang hnuai Sui Mintami hmun ah mipi kilhimtu pawlin an rak bawh ih bomb 28 an kam. Bomb kammi an pal puak veten Lai meithal in an kap ciamco hngal ih a hmun ah ralkap 20 hrawng an thi.

Be the first to comment

Leave a Reply

Your email address will not be published.


*