Palik In Thawngtla Fala A Tlanhlohpi

Mandalay, Mahlaing khua ih thawngtla fala pakhat cu July 10, 2022 simlam ah a kiltu palik in a hruaisuak ih a tlanhlohpi.

Ṭuanvo neitu in, “Fala Ma Ei Thandar Aung cu dothlennak ruangih an kaihmi a si, pukmah 50 in thawng a tla. Manisun ah thawnginn leng an suah laiah thawngtla pawl kiltu palik Soe Wen in a ru ih a tlanhlohpi. Meithal an keng lo, fala cu a kut hrentannak thawn a tlan. A hlan ihsin ruahmannak an rak neicia ding” a ti.

Myanmar palik san thuanthu sungah palik in thawngtla a tlanhlopi cu tuitum hi a veikhatnak a si tin an phuang. Palik pawlin kai lohli dingin an hawl rero lai. Palik ṭuan zo pakhat in, “Nunau thawngtla pawl cu palik nunau pawlin an kil ṭheu. Thawngtla nunau le palik mipa an pehtlaih aw thei cu uknak a ṭhat lo ruangah a si” a ti.

Thudang: Kalaymyo Ah Ralhrang Pawlin Chinmi An Kap That: Kalaymyo, Myae Aung Sii vengsung ih um pacang kum 29 mi Pa Muan Suan Khai (ဦးမုံစွန့်ခိုင်) cu July 9 zanlam ah ralhrang pawlin an kap. July 9 zan ah bike kethum nei thawn a rualpi pawl ava thlah, a fanu le a rualpi 2 thawn an poksuak.

Ralhrang pawlin an rak kap, a rualpa pakhat ih ke khalah an kap ngah. Pa Muan Suan Khai cu siizung ah an tlanpi ih July 10 zingpit nazi 3:00 ah a thi. A nupi le a fale 3 a thihsan, a ruak cu a suahsemnak Tidem peng, Haichin khua ah an phur tlung ih July 11 ah an vuiliam.

Be the first to comment

Leave a Reply

Your email address will not be published.


*