Pasal Nei Loin Fate 3 A Nei >>>

China fala kum 33 mi Li Xueke in pasal nei loin fate 3 anei cu mipa pawlin an soisel zet, “Nangmai zawn lawng na ruat aw” an ti. Li Xueke hi sumdawng milian a si ih model hminthang khal a si, tlangval cu arak nei ve hnuaihni zo nan pasal ding ngaingai a hmu lo ruangah pasal neih cu a tum nawn lo.

Kum 29 mi a si laiah kum 30 a kim hlanah fate neih tengteng a duh, sibawi thiamnak IVF hmangin naupai a tum. China ramsung ah neihawknak capi um lo cun IVF hmangin naupai an siang lo. Curuangah Thailand ramah ava feh ih IVF hmangin nau a pai.

Mipa cii cu mirang British mipa cii a hmang, kahpia fate cu an mawi cuang a ti ruangah British mipa cii a lei ih veikhat ah naute 3 a pai. Cutin pasal nei loin fate 3 nunau 1 le mipa 2 anei ih a nu le a pi in an kilkhawi, an innsang cu an nuam zet ih zodang an ngai lo.

Li Xueke in, “Innsang ah duhdawtnak a thupi bik. Kei cu ka nu lawngin in rak cawm thanglian, ka nu in duhdawtnak famkim in pe. Ka hringnun ih ka rak hmuhtonmi ruangah keimah le keimah ah rinsan awknak ka nei tam” a ti.

Li Xueke hi a nauhak laiah a nulepa an ṭhenaw ih a pa in nupi dang a neihsan, a nu in harsa zetin a cawm thanglian, a nu cu pasal dang nei nawn loin a fanu hrangah a hlanaw. A nauhak lai cu harsa zetin a nu thawn caan an hmang ih a pa in a ngaihsak lo.

A pai hnenah aum lawk nan a pa in kut a thlak ciamco ruangah a pa cu a hua tuk ih a hnenah aum duh nawn lo. Cutin a upa vivo ih model a lut hnuah hlawhtlinnak nasa zet a tong. Media pawlin hmailam caan ah pasal neih na tum maw? tin an sut ih.

“Pasal neih ka tum lo, duhdawtmi mipa cu ka nei men thei nan neihawk cu ka tum lo. Neihawknak cu cahnah men a si, cumi sungah daan le dun aum bet ih an ṭhenaw leh thotho. A thupi bik cu duhdawtnak hi a si, duhdawt aw zetin kan umtlang asilen neihawknak cahnah men hi ka ṭullo. Ka fale pawl hrangah duhdawtnak famkim pek thei ka tum, ka fale pawl cu an duh asilen an upat tikah nupi pasal an nei ding, anmai thuthu. Anmahten an um ve thei asilen a poi lo. it’s OK” a ti.

Be the first to comment

Leave a Reply

Your email address will not be published.


*