Pawngsual Tong Fala Cu Khualeng Ah An Umter

Shan State, Ta’ang ramsung, Hohseng khua ah fala kum 28 mi cu vengsung mi pacang kum 26 mi in a sualpi ruangah nau a keng. An nunphung daan le dun vekin fala cu khualeng ah an umter.

Tualsung mi pakhat in, “Khua ihsin kan dawisuak a si lo. Nau a neih hlan sung cu khualeng ah aum ding, nau a nei ih thlakhat hnu lawngah khuasung ah a lut thei ding. Thawngtla suak pawl khal an thianghlim lo ruangah tidai thiang in an tak kan kholh ṭheu.

Pawngsual tong fala khal a thianghlim lo ruangah thianhlimnak ah khualeng ah nau a neih hlan sung aum ding” a ti. Pawngsualtu pacang cu TNLA ralkap pawlin an kai. Ta’ang ramsung ah nunau dinhmun hi a niam zet. Hlanlai an nunphung le daan cu tuini tiang an hmang rero lai. Pawngsual tong nunau pawlin zo hnenah thubuai an thehlut ding ti khal an thei lo.

Nunau pawl humhimtu TWO hotu in, “Tui thla sung lawngah nunau pawngsual tong an tam zet. Kum 2 sungah Kutkai ramsung ah hiti vekih thubuai 5 aum. Nunau pawl pawngsualtu cu an sungkhat naivai hlir an si, nulepa pawl khalin fale pawl hi nunsim ṭhah a ṭul” a ti.

Thudang: Siibawi In Putin Cu ‘Kum 3 Lawng Na Nungdam Ding’ A Ti
Kum 69 mi Russia president Vladimir Putin cu damlonak phunphun anei. Cancer le taksa ṭhia natnak Parkinson anei, a kut le ke hi a ṭhia nasa tuk ruangah cang loin aum thei lo. May 16 le May 17 ah a cancer natnak cu operatian an tuah. Siibawi in, “Kum 3 sung lawng na nungdam ding” a ti, cumi khal nitinten siibawi pawlin an kilkhawi ringring ding.

Hmin tarlang lo Russia agent pakhat in Putin ih damlonak thuthup cu Russia agent hlun Boris Karpichkov hnenah a sim thei. “Tulai hi Putin a damlo besia zet, asinan a damlonak cu mipi theihter a duh lo. A khuahmuhnak a mit khal a siat zo, mitkharh bun a ṭul tuk nan mitkharh bun cu cahlonak ciikhat ah a ruat ih a bun duh lo. Siibawi pawl kilkhawinak in kum 2/3 sung lawng a dam thei ding” a ti.

Be the first to comment

Leave a Reply

Your email address will not be published.


*