Pawngsual Tong Nunau Cu Ṭuanvo Neitu In ‘A Um Ṭhat Lo Ruangah’ A Ti

Shan State, Kutkai ramsung ih um khua pakhat ah pawngsual thuthla an buaipi rero lai. Nikum June 2021 ah nunau pakhat cu tualsung pacang kum 27 mi U Aik Dae in a sualpi, U Aik Dae cu nupi nei lai a si ih fa (2) anei.

Nunau cu loram ah hnaṭuan in a nu tei nupa thawn thlam ah an riak, himi zan ahcun a nu tei nupa cu inn lamah an va riak. Cutawk ah U Aik Dae in thlam ih riak nunau cu arak lutchilh ih a sualpi ruangah nau a pai.

Khuatlang hruaitu pawlin khua hmin na siatter tin nunau sawn cu hremnak an pe, pawngsualtu pacang cu zianghman hremnak an pe lo. Nunau cu fasawn a pai ruangah ting 4 an kuanter ih nau a neih hlan cun khawleng ah an umter.

Nau a neih hnu thlakhatnak lawngah khuasung ah an lutter, an khuasung ih thilthleng cu an thup ringring nan Nunau Pawlkom in an khua ah training an va pe ih an khuasung ih thilthleng cu an theisuak. Cumi hnuah TNLA ralkap pawlin pawngsualtu U Aik Dae cu an kai.

U Aik Dae an kaih ruangah pawngsual tong nunau cu tualsung mipi pawlin an hmuhsuam zet, khualak khalah a vaksuak ngam lo ih a ṭap. U Aik Dae ih innsang pawl khalin an hringhro.

Ṭuanvo neitu in, “Himi thuhla cu kan nunphung daan le dun in kan cinfel zo. Nunau hi a um ṭhat lo ruangah hi thil a thleng, nunau in fa 3 a nei zo. Sumpai nei mipa pawl cu a thlun ih an sumpai a eisak. Neta ah hivek thil a tong sal asilen khuasung ah um kan siang nawn lo ding” a ti. June 8, 2022 ah U Aik Dae ih pa le khua upa ṭhenkhat in nunau cu an hruai ih TNP sakhan ah an va feh ih U Aik Dae cu suah zalen dingin an ngen nan an suah hrih lo.

Be the first to comment

Leave a Reply

Your email address will not be published.


*