PDF Ih A Lut Ruangah A Nulepa In An Fapa Sinak Ihsin An Hlon, A Nulepa A Seherh Tuk Nan A Kirsal Thei Nawn Lo

Min Aung Hlaing in Myanmar ramsung thuneihnak a lak ruangah innsang tin ah harsatnak phunphun a thleng ih duhdawtmi innsang ṭhenawknak khal a thleng rero zo.

Mandalay, Meikhtila ramsung ih um tlangval Mg Than Soe Hlaing cu mipi kilhim dingin PDF ih a lut ruangah a nulepa in an fapa sinak ihsin an hlon thu a rualpi pawlin October 28 sun ah Mizzima thuthang hnenah an sim thei.

A rualpi pawlin “Dothlennak ih a thinlung put cu a pacang tuk. A innsang pawl a duhdawt tuk nan dothlennak lamzin parah a feh zo ih dunglam ah a kirsal thei nawn lo ding” an ti.

A nulepa in “Kan fapa Mg Than Soe Hlaing cu nulepa thusim a lung lo ruangah thinharnak, taksa harsatnak pawl a thlen ih inn ihsin a tlansuak ruangah tuisun ihsin kan fapa sinak ihsin kan hlon a si. Anih thawn pehtlaihaw mi thil ziangkim ah ṭuanvo kan la nawn lo ding” tin ralkap kuthnuai ih thuthang sungah an tarlang.

Ralkap in thuneihnak an lak pekte ah Mg Than Soe Hlaing cu lamzawh duhphurhnak ah arak tel ṭheu, asinan ralkap pawlin daiten lamzawhtu pawl cu an kap that ṭheu ruangah April thla ah hmunhimnak ah a tlan ih meithal kengin doawknak tualrawn ah a lut. Yangon, Mandalay ramsung ih mino tam zet cu hmunhimnak ah an tlan ih meithal kengin ralkap pawl an do ṭheu ruangah an nulepa pawlin an fate sinak ihsin an hlon rero zo.

Be the first to comment

Leave a Reply

Your email address will not be published.


*