PDF (Kalay)၊ CNDF Le Ralhrang Pawl An Kahawknak Ah Ralhrang 2 An Thi, PDF Pakhat Nunnak Liam

December 19, 2021 simlam ah ralhrang 150 hrawng cu Kalaymyo, Cicai, Sekan, Sentaw khua kiangkap ah an vaktawi. December 20 zingpit ah PDF (Kalay) tatzin 5 sakhan hlun cu an urkang, zinglam nazi 10:00 hrawngah PDF (Kalay)၊ CNDF pawl thawn an kapaw ciamco, Țaungphila tlang ih umhmun khuar ralhrang pawlin ralthuampi in an kap bawm.

An kahawknak ah ralhrang pawlin ralthuam picang lawng an hmang tlangpi, simlam nazi 5:00 hrawngah ralhrang pawl cu Cicai khua sungah umhmun an va khuar ih khuasung inn 2 an urkang. Ralhrang pawl ih ralthuam picang kahnak ruangah kiangkap khua inn 4 a kangral, kiangkap khuasung mipi pawl cu sahimnak hawlin hmun dangdang ah an tlan thluh.

Zan nazi 8:00 hrawngah Cicai khua ih umhmun khuar ralhrang pawl cu PDF (Kalay)၊ CNDF tangtlang in an va kap ih minute 30 sung hrawng doawknak a thleng sal. An doawknak ah ralhrang 2 an thi, PDF (Kalay) ihsin pakhat in a nunnak a hlan. PDF (Kalay) pakhat le CNDF pakhat in hliam an tuar.

Cicai khua ih umhmun khuar ralhrang pawl cu tuizing December 21 ah Naga Puk khua lamah an feh, cutawk ihsin ralhrang ṭhenkhat cu Technological University lamah an fehsal. Kalaymyo kiangkap ah doawknak hi a suak thei ringring ruangah mipi khal fimkhur zet le ralṭha zetin um dingin theihter an si.

Thuan Bil Fahniang ih nganca: “Lairawn a hmin ‘Tihangva ral’, Zo dang ngai lo’n tual kan lennak khua dildelte, Atu ahcun ral ram ah a cang ta maw! Sunghno nu in thinham kaiaw lo’n a fahniang a paw, Vei ziangzat kan tlansuak thlang, ti’n a kutzung a vun khiak!

Caw kan rak khalhnak roling Bualpirawn, Saihlum kan hrual ṭheunak tlakvarawn le, Zingthlapit ih theidum kan thlawn ṭheunak tithir, Atu ahcun sihal rual keneh in a khat. Thlacam thawm hmurhmo thannak Bethel tlang, Bomb khu le zian khu in a zel.

Rawtuai kan khorh ṭheunak Partiamva le Ngauva, Mipi ralkap pawl tla ziarang an thainak hmun. Tihangva ral khua pawl hi, Kan mawlmang nan, kan aa lo, Kan tangdor nan, kan ṭihhrut ce lo, Mipi ralkap rual ti le rawl hrawnnak khua kan si. Kan tapsak zawl ah paralṭha pawl thinthiten an zau.

Sakhi thingpar kaiter in buaipisirh thleng pang sehla, Lairawn khaw za lakah ralhrang kut-kha tuartu bik ding kan si. Cu tikcaan ah ‘Tihang ral pawl’ tin in dungtun hram hlah uh! Kan lo ngen ee, nan kutzaṭial in san hram uh, Ramleng, ramsung, kawhhran tin le Pawlpi tla.

Be the first to comment

Leave a Reply

Your email address will not be published.


*