PDF (Kalay) Mino Pakhat Cu Dalan Ruangah An Inn Te An Rak Urkang Sak

PDF (Kalay) mino pakhat cu thuneihnak latu ralkap pawl do in ramlak ah aum, dalan in ralkap pawl hnenah an rak hek ruangah an runinn cu an urkang sak. PDF mino in an inn vutcam ih cang cu a tarlang ih a nu le a farnu cu thinhar tuk lo dingin a hnem.

PDF (Kalay) mino in “Mizan (September 7) ah dalan pawl ih heknak ruangah kan inn cu ralkap pawlin an urkang. Ka farnu le pawl ramdang ah hna an ṭuan ih an thlahlawh an khawl hnuah kan sak mi inn a si ruangah ka riahsia tuk, asinan dothlennak ah ka tel vivo ding.

Ka nu le ka unu nan beidong hlah uh, nan thinhar ding ti cu ka thei ko. Dothlennak kan neh hnuah ralkap pawl ih an ti siat mi inn ai ih ṭha sawn Pathian’n in pe ding ti ka zum, ka nu le ka unu rak zuam ṭento hrih uh.

Bible sungih Job khal harsatnak a tuar hnuah Pathian in a let 7 in thlausuahnak a pesal a si kha, Pathian in a let 7 in thlausuahnak in pesal ding ti zumnak thawn thla rak cam uh.

Pathian in riahsiatnak lak ihsin lungawinak in pesal ding, sungralnak lak ihsin thlausuahnak in pesal ding. Dothlennak ah nehnak kan co zik thlang ih hnangamten kan umtlang theinak ding hrangah thla rak cam uh. Ka nu le ka u, ka lo duhdawt tuk” tin a tarlang.

Be the first to comment

Leave a Reply

Your email address will not be published.


*