PDF-Kalay Nuralṭha 9 An Kaihmi Ih Thuhla

Ralhrang pawl ih an kaihmi PDF-Kalay nusalṭha 9 ih thuhla a cipciar cun pholang a si hrih lo nan mallai tarlannak kan nei ding. November 16, 2021 ah ralhrang pawlin PDF-Kalay Battalion 3 sakhan cu ralthuampi thawn an va kap ciamco ih sakhan cu an la.

Sakhan sungih um Medical Team nunau 10 le mipa 2 cu an kai, ralhrang pawlin Battalion 3 sakhan an lak hnu November 16 le 17 sun ah mipi kilhimtu pawl thawn nasa zetin an kapaw ciamco ih ralhrang tam zet an thi.

Kalay-PDF ṭuanvo neitu in, “PDF-Kalay Battalion 3 sakhan an la ti kan theih veten simlam ah runsuak dingin kan va kulh thluh hngal, sakhan kiangnaite ahcun kan feh thei lo. Ralthuampi le meithal an kap rero, ralhrang pawl khal an suak thei lo. A thaizing ah an kaihmi pakhat ih phone ah kan call ih ralbawi pakhat in arak kai. An hotu in feh in siang uh, in kap hlah uh. In kap asilen nunau pawl hi kan that thluh ding tin in hringhro” a ti.

An kaihmi nusalṭha pawl cu ralhrang in ralkham awknak ah an hmang vivo ruangah mipi kilhimtu pawl khal an buai zet. Cumi hnu ihsin an phone tlang thei nawn lo ih biakawknak khal aum nawn lo. Cutin mipi kilhimtu pawlin an kulh thluh laiah hmun dang ih um ralhrang pawlin an va bawm ih an kapaw ciamco, sakhan ih um ralhrang pawl khalin an kap.

Himi sun an kahawknak ah ralhrang 5 an thi. PDF-Kalay Battalion 3 sakhan latu ralhrang le anmah ra bawmtu ralhrang pawl cu Nagar Puk khua ah an va feh ih an kaihmi nusalṭha pawl cu ralkham awknak ah an hmang vivo, Nagar Puk khua khalah mipi kilhimtu pawlin an va kap nan an kaihmi pawl hi an tuahmawh ding an phang ruangah an kirsal.

Simlam ah PDF-Kalay Battalion 3 sakhan cu an va thianfai ih mithi ruak pathum hmuh a si ih sakhan kiang hmun pakhat ah an vuiliam. An kaihmi nusalṭha pawl cu Kalaymyo ralhrang thusutnak hmun ah an kuat. Thuhla theitu pakhat in, “An kaihmi pawl cu palik sakhan ah an ret lawk, cumi hnuah Regional Command Headquarters ah an hruai. An thuhla cu thinphang zetin kan hngak ringring lai” a ti.

Ralhrang pawl khalin an kaihmi nusalṭha pawl ih thuhla cu an phuangsuak hrih lo, an kutsung ah nusalṭha 8 lawng an um thu theih a si. Ṭuanvo neitu in, “An kaihmi nusalṭha pawl ih thuhla cu kan dum vivo. Nusalṭha 9 an kai nan RCH hmun thleng cu 8 lawng an si tin thuthang aum. Thil pakhat khat tuah tum ih bumawknak a si men thei, doawknak tualrawn ah an um lai teh a si kem maw tin kan va hlakhlai rero lai” a ti.

November 21, 2021 ah Kalaymyo thlanglam Kyauk Pyut khua ah ralhrang le PDF-Kalay pawl an kapaw ciamco ih ralhrang 5 an thi, PDF-Kalay Battalion (4) ihsin pasalṭha pahnih ih nunnak a liam.

Be the first to comment

Leave a Reply

Your email address will not be published.


*