PDF Pakhat Cu Hringtu A Nu Damlo Bese Ruangah Ava Tlung Duak Ih Ralhrang Pawlin An Rak That

Mandalay Division, Madara khua ih um kum 31 mi U Ye Thu Naing cu cozah hnaṭuan sinak sang zet kaitu pakhat a si. Asinan ralhrang pawlin ramsung thuneihnak an lak ruangah an kuthnuai ah hna a ṭuan duh nawn lo ih CDM a tuah.

Madara ramsung ah CDM tuah hmaisa lam a si ih cozah hnaṭuan dang pawl khal CDM tuah dingin a sawm ṭheu. Curuangah ralhrang pawlin April thla ahkhan kaih an tum ih ramlakah a tlan, cutin PDF ah a lut. Hringtu a nu hi a damlo bese tuk ti a theih ruangah November 19 zan ah ava tlung ih nihnihnak ah ralhrang pawlin an kai.

A kut cu hridai in an tawnbet ih PDF umnak sakhan an khihhmuhter, ralhrang 100 le ralkap motor 4 thawn an poksuak ih November 22 ah tlangpar ih PDF sakhan cu an va nuai tum nan PDF sakhan aum lo ih thlamte lawng an hmu. Ralhrang pawlin thlamte cu an urkang ih a kiangah U Ye Thu Naing cu an kap that.

November 28 sun ah kiangkap khuami pawl cu tlangpar ah an va kaiso ih thlam kangral kiangah U Ye Thu Naing ih ruak cu an hmu, a kut hi hridai in an tawnbet lai ih a lu ah meithal kahnak hliamhma aum. Tualsuang mipi kilhumtu in, “U Ye Thu Naing hi an kai ih PDF sakhan umnak an khihhmuhter, a kut khal hridai in an tawnbet.

Kan theihdan ahcun a khihhmuhnak hmun ah zohman an um lo, thlamte lawng an hmu ih an urkang. An tlunpi sal ah kan ruat nan kiangkap khuami pawlin ramlakah a ruak an va hmu” a ti. U Ye Thu Naing ih a tlun thuhla hi ziangtin ralhrang pawlin an rak theithei ti cu theih a si lo, dalan ruang khalah a si thei.

Kiangkap um pawlin U Ye Thu Naing cu ahlan ah cozah hnaṭuan sinak sang zet kaitu a si ruangah hmeltheih khal a nei tam tuk, khuasung ah an hmu ih amah ti an theihthiam lohli ruangah an kai si ding an ti. An kaih sun ih a hnipuan hruh le a ruak an hmuh ih a hruhmi hnipuan cu a bangaw lo, an kaihsun ahcun hnipuan pangaite a hruh nan a ruak an hmuh tikah cun Madara-PDF kor a rak hruh tin mithmtu pawlin an rel.

Be the first to comment

Leave a Reply

Your email address will not be published.


*