PDF Pawl An Tlansuah Theinak Dingah Amahten Ralhrang Pawl Kham In A Kap Ciamco, Ralhrang Kut Sungih Um Aiin A Thataw

PDF paralṭha pakhat cu a rualpi pawl hrangah a nunnak a hlanaw. Yangon, Thanlyin Township, Lahar Yat khua ih um PDF sakhan cu December 17, 2021 ah ralhrang pawlin an va sim ih an kap ciamco. Ralhrang pawl cu an tam zet ih ralthuam kimcang in PDF sakhan cu an va kulh.

Thanlyin-PDF sakhan cu dalan ih heknak ruangah ralhrang pawlin an thei ih an va sim, cutawk ah PDF paralṭha Phyo Maung Maung Oo in a rualpi pawl cu a tlansuahter thluh ih amahten ralhrang pawl a kap ciamco.

PDF pawl an tlansuah theinak dingah ralhrang pawl cu arak kham ih a kap ciamco, a rualpi pawl an tlansuah thluh hnuah ralhrang pawl cu a neh nawn lo ih ralhrang kut sungih um ding aiin tin a kapaw that. Phyo Maung Maung Oo ih ruak cu ralhrang pawlin an la ih ruak hlamtu nei lo vekin an phum.

PDF pakhat in, “Kan upa hi miṭha zet a si, a naule pawl a seherh thei tuk. Tu’khalah a naule pawl an tlansuah theinak dingah amahten ralhrang pawl a kap, a kham thei nawn lo tikah ralhrang kut sungih um ding aiin a thataw sawn. Thudik lo cu a tuar men thei lo ih ralṭha zetin a do ṭheu, amah hi val-u a si” a ti.

Hringtu a nu cu thin cancer in a damlo bese tuk ruangah an sungkhat pawlin a fapa ih thih thuhla cu an sim ngam hrih lo. Ralhrang in ramsung thuneihnak an lak hnu February 1 ihsin ralhrang pawl dothlennak ah a lut ih a innsang pawl khal a pehtlaih nawn lo. Thanlyin-PDF khalin cawimawinak an hlan ih a ruak cu ralhrang pawlin an hloralter nan a ralṭhanak, ram le miphun hrangih a pekawknak cu a vul ringring ding’ an ti.

Be the first to comment

Leave a Reply

Your email address will not be published.


*